ენგურის ხიდიდან, საოკუპაციო ხაზიდან გადმოაბრძანეს აფხაზეთიდან დაბრუნებული ღვთისმშობლის ხატი. ხატის დაბრუნების და ხიდთან გადმობრძანების პროცესს “პატრიოტთა ალიანსის” ლიდერები და აქტივისტები ესწრებოდნენ. ასევე სასულიერო პირები. ამ ხატს თბილისის მიმართულებით სასულიერო პირები მიაბრძანებენ და სავარაუდოდ ქუთაისში, ბაგრატის ტაძარში დააბრძანებენ. ცნობისთვის, აფხაზებმა ენგურის ხიდამდე ღვთისმშობლის ხატი რამდენიმე დღის წინ მოაბრძანეს. მანამდე ხატის დაბრუნების შესახებ განცხადება “აფხაზეთის მართლმადიდებელმა ეკლესიამაც” გაავრცელა და აღნიშნა, რომ მსგავსი აქციები მიუღებელია მანამ, სანამ ქართული ეკლესია აფხაზურის დამოუკიდებლობას არ აღიარებს. ქართველმა პოლიტიკოსებმა – პარლამენტის ვიცე-სპიკერმა ირმა ინაშვილმა და მისმა თანაპარტიელმა, “პატრიოტთა ალიანსის” წევრმა გიორგი ლომიამ ოკუპირებულ აფხაზეთში, ილორის მონასტერში ღვთისმშობლის ხატი რამდენიმე კვირის წინ ჩააბრძანეს.