გუშინ ღამით, მდინარე ენგურმა შუახნის კაცის ცხედარი საოკუპაციო ხაზთან, ორსანტიის ტერიტორიაზე გამორიყა. ერთ-ერთი ვერსიით, შესაძლოა, დაღუპული ოკუპირებული აფხაზეთის ე.წ საზღვრიდან ზუგდიდში გადმოდიოდა. გავრცელებული ინფორმაციით, არის შემთხვევები, როდესაც ოკუპირებული აფხაზეთის ე.წ. საზღვრიდან იპარებიან, რათა კარანტინში არ მოხვდნენ. ცხედარი იდენტიფიცირებულია, ის ოკუპირებული გალიდან არის. შსს-ს ცნობით, მომხდარზე გამოძიება სისხლის სამართლის კოდექსის 115-ე მუხლით მიმდინარეობს, რაც თვითმკვლელობამდე მიყვანას გულისხმობს.