დიდუბე-ჩუღურეთისა და საბურთალოს ოლქებში გაერთიანებულ ოპოზიციას შეთანხმებული კანდიდატები ჯერ არ დაუსახელებია. თბილისის ექვს ოლქში საერთო კანდიდატები “ლეიბორისტული პარტიის” ოფისში ოპოზიციამ რამდენიმე კვირის წინ დაასახელა. თუმცა ორი საკვანძო ოლქის საკითხი კი ჯერ ისევ ღიად რჩება.
საბურთალოს გუშინ კიდევ ერთი კანდიდატი შეემატა. დავით სერგეენკოს, ლევან გოგიჩაიშვილსა და ბადრი ჯაფარიძესთან ერთად, საბურთალოს მაჟორიტარობისთვის “პარტია მოქალაქეების” დამფუძნებელი ალეკო ელისაშვილიც იბრძოლებს.
დიდუბე-ჩუღურეთის მაჟორიტარობა კი ჯერ მხოლოდ გიორგის ვოლსკისა და ანა დოლიძეს სურთ.
“ნაციონალური მოძრაობის” პოლიტსაბჭოს წევრი ხატია დეკანოიძე ამბობს, რომ მაჟორიტარებზე გადაწყვეტილებას პარტია მალე მიიღებს.
“ლეიბორისტული პარტიის” მაგიდის ირგვლივ გაერთიანებულმა ოპოზიციამ თბილისის ექვს მაჟორიტარულ ოლქში საერთო კანდიდატები 19 ივნისს წარადგინა სია ასეთია:
- ვაკის რაიონში კენჭს “ევროპული საქართველოს” წევრი ელენე ხოშტარია იყრის;
- გლდანში მაჟორიტარობისთვის “ნაციონალური მოძრაობის” ერთ-ერთი ლიდერი ნიკა მელია იბრძოლებს;
- ამავე პარტიის წევრი, ლევან ხაბეიშვილი სამგორის ოლქში წარადგინეს;
- მთაწმინდის რაიონში მაჟორიტარი დეპუტატობის კანდიდატი “თავისუფალი დემოკრატების” ლიდერი შალვა შავგულიძე იქნება;
- “ლეიბორისტული პარტიის” ლიდერი შალვა ნათელაშვილი კი კენჭს ნაძალადევში იყრის;
- ისანში კი ოპოზიციის წევრებმა “ახალი საქართველოს” ლიდერი, გიორგი ვაშაძე წარადგინეს.
ასევე, შეუთანხმებელ მაჟორიტარულ ოლქებში საკუთარ კანდიდატურებს წარადგენს ,,გირჩიც” , ამის შესახებ პარტიამ ოფიციალური განცხადება 4 აგვისტოს გაავრცელა.