,,თამარ ბაჩალიაშვილის კომპიუტერი გახსნილია – ვნახოთ, რა იქნება შიგნით” – ადვოკატი მიხეილ რამიშვილი

0
466

თამარ ბაჩალიაშვილის კომპიუტერი გახსნილია. სამხარაულის სახელობის სასამართლო ექსპერტიზის ეროვნულ ბიუროში თამარ ბაჩალიაშვილის პირადი კომპიუტერის სკანირება დაიწყეს. პირველი არხის ცნობით,  პროცესს ბაჩალიაშვილის ოჯახის ადვოკატი მიხეილ რამიშვილი დაესწრო.

მიხელ რამიშვილი ყურადღებას ამახვილებს იმ ფაქტზე, რომ კომპიუტერი სამართალდამცველებმა 19 ივლისს წაიღეს და ექსპერტიზის ბიუროში კი 22 ივლისს შეიტანეს. ის ეჭვობს, რომ შესაძლოა, კომპიუტერის გახსნა აქამდეც მოხერხდა.

“ვუთხარი, არ მოეხდინათ ამ კომპიუტერის გახსნა ჩემი თანდასწრების გარეშე. მითხრეს, რომ ასე მოხდებოდა. ბოლომდე მაშინ დავრწმუნდები იმაში, რომ არ მოხდა წინასწარ შესვლა, როცა ყველაფრის კლონირება დასრულდება. მე მაინც ვეცდები, გადავამოწმო. ექსპერტების მხრიდან ჯერჯერობით ყველა კითხვაზე არის პასუხი. არაფერი ეტყობათ არაპროფესიონალიზმის. იდეალურად იყო განხორციელებული ეს პროცედურები,” – განაცხადა რამიშვილმა.

რამიშვილმა ჟურნალისტებს განუცხადა, რომ ექსპერტიზის ბიუროში პერსონალური კომპიუტერის სკანირებას სავარაუდოდ რამდენიმე დღე დასჭირდება. ადვოკატი აცხადებს, რომ ექსპერტები აღადგენენ წაშლილ ფაილებსაც.

“ვნახოთ, რა იქნება შიგნით. შემიძლია, გითხრათ, ბევრი საინტერესო რამ შეიძლება, იყოს მოძიებული. დეტალურად გვეცოდინება, როდის იყო ჩართული ბოლოს კომპიუტერი. ყველაფერი გადამოწმდება,” – თქვა რამიშვილმა. 

რამიშვილი ასევე გამოეხმაურა გავრცელებულ ინფორმაციას, რომ თამარ ბაჩალეიშვილის Facebook გვერდი აღარ იძებნება:

“იყო საუბარი, რომ დღეს ექაუნთი გაქრა და მოვითხოვე, ასე უცებ რა მოხდა. მითხრეს, რომ აღდგენის შემდეგ მოხდება Facebook-თან დაკავშირება. იდენტიფიკაცია უნდა მოხდეს, ვის მიერ მოხდა გაუქმება. ეს გამოძიების ინტერესებშიც არის”.

წინა სტატიაავიამიმოსვლა პანდემიამდე არსებულ მდგომარეობას 2024 წლამდე ვერ დაუბრუნდება – საჰაერო ტრანსპორტის ასოციაცია
შემდეგი სტატიაკელი დეგნანი: ,,ხმების მოსყიდვისგან და ამომრჩევლის დაშინებისგან თავისუფალი აჩევნები , არის საუკეთესო გზა საქართველოს მიერ დემოკრატიული პროგრესის მიმართ ერთგულების საჩვენებლად”
ტელეკომპანია ოდიშის საინფორმაციო სამსახური