ბაჩანა შენგელიას სანოტარო საქმიანობის უფლება აღუდგა – სასამართლოს გადაწყვეტილება მისთვის დღეს გახდა ცნობილი. სასამართლოს ზუსტად ერთი დღე დასჭირდა იმის დასადგენად, რომ შენგელიას მიმართ იუსტიციის მინისტრის მიერ მიღებული გადაწყვეტილება უკანონო და პოლიტიკურად მოტივირებული იყო.
საქალაქო სასამართლოს 30 ივნისის გადაწყვეტილებით, დაკმაყოფილდა ჩემი განცხადება და იუსტიციის სამინისტროს დაევალა, ბაჩანა შენგელიასთვის სანოტარო რეესტრთან და სანოტარო საქმიანობისთვის საჭირო ყველა პროგრამასთან წვდომის აღდგენა. ეს არის ძალიან დიდი გამარჯვება, – ამბობს ბაჩანა შენგელია.
ნოტარიუსის თქმით, სასამართლომ მიიჩნია, რომ მისთვის საქმიანობის შეწყვეტა ნოტარიატის შესახებ კანონს ეწინააღმდეგებოდა.
შეგახსენებთ, რომ რამდენიმე დღის წინ, იუსტიციის მინისტრის თეა წულუკიანის განკარგულებით, მას სანოტარო საქმიანობა შეეზღუდა, რის მიზეზადაც ნოტარიუსის ფეისბუქის პირად გვერდზე განთავსებული პოლიტიკური განცხადებები იქცა.