ევროპული საქართველოს ერთ-ერთი ლიდერი გიგა ბოკერია ეხმაურება ქართული ოცნების აღმასრულებელი მდივნის, ირაკლი კობახიძის განცხადებას, რომლის მიხედვითაც, აშშ-ს ეროვნული თავდაცვის აქტში შესული ცვლილება მისი და სენატორ რიშის აპარატის უფროსის მეგობრობის შედეგია.
“ბატონი კობახიძე ჩემთვის კომპლიმენტების თქმას აგრძელებს. ჯერ თქვა, რომ გოიმებში ნომერ პირველიაო, ახლა თქვა ჩემზე, რომ ჩემი პირადი კონტაქტები განსაზღვრავს სენატის გადაწყვეტილებებს. პირველი კომპლიმენტი მივიღე, მეორეს, სამწუხაროდ, ვერ დავიბრალებ, არ მაქვს ამხელა გავლენა”, – თქვა ბოკერიამ.
გიგა ბოკერიას შეფასებით, სტრატეგიული პარტნიორი იმდენად არის შეშფოთებული ქვეყნის შიგნით მიმდინარე ამბებით, რომ “საჭიროდ თვლის ასეთ მკაცრ გზავნილს ასეთ მნიშვნელოვან დოკუმენტში.”
შეგახსენებთ, ირაკლი კობახიძემ აშშ-ს ეროვნული თავდაცვის აქტში შესულ ცვლილებას, რომელიც საქართველოს ეხება, ევროპული საქართველოს ლიდერის, გიგა ბოკერიასა და სენატის საგარეო საქმეთა კომიტეტის თავმჯდომარის, ჯეიმს რიშის მეგობრობის შედეგად გამოაცხადა.
“ეს არის ბოკერიას და [სენატორ რიშის] აპარატის უფროსის მეგობრობის შედეგი. ეს, ბუნებრივია, ვერაფერს ვერ დააკლებს ქვეყანას და ვერაფერს ვერ დააკლებს ქართულ ოცნებას, თუმცა ეს აზიანებს საქართველოს საერთაშორისო პარტნიორების რეპუტაციას და ეს არის ერთერთი შედეგი იმ საქმიანობის, რასაც ახორციელებს გიგა ბოკერია, კრიმინალური ოპოზიციის ერთ-ერთი ლიდერი”. – ამბობს კობახიძე.