ქვეყანაში არსებული პანდემიის მიუხედავად ზუგდიდელმა ფერმერმა აბესალომ გარმელიამ ლურჯი მოცვის პლანატაცია დამატებით 3 ჰექტარზე გააშენა.  საერთო ჯამში სოფელ ნარაზენში  გარმელიებს 9 ჰექტარზე აქვთ გაშენებული და მოსავლის აღებას თვის ბოლოსთვის გეგმავენ.ფერმერი ამბობს, რომ შეზღუდვების დროს სპეციალური საშვით სარგებლობდა და მიწის დამუშავების პრობლემა არ ქონია.

მიწა დამუშავებულია, ნერგები  უკრაინიდან ჩამოაქვს, 5 სხვადასხვა ჯიშის მოცვი აქვს გაშენებული, სულ 27 ათასი ძირი. ერთ თვეში ფერმერი  10 ტონამდე მოსავალს ელოდება, რომლის გატანასაც ევროპაში გეგმავს.

მოცვის პლანტაციაში მუდმივად 5 ადამიანია დასაქმებული, ხოლო სეზონზე, სრული დატვირთვით 80-მდე ადგილობრივი მუშაობს. ფერმერი ამბობს, რომ პანდემიამ დამოკიდებულება შეცვალა და დაგვანახა, რომ გლეხი აუცილებლად უნდა დაუბრუნდეს მიწას, რომ  ადგილობრივი  პროდუქციის წარმოება გაიზარდოს. ფერმერი სოფლის მეურნეობის პროგრამის ფარგლებში საწვავზე სუბსიდირებას და ყოველ ჰექტარზე 200 ლარიან დახმარებას მიიღებს.

სამეგრელოს რეგიონში ყველაზე მოთხოვნადი სოფლის მეურნეობის სახელმწიფო პროგრამა ,,დანერგე მომავლის“ – კენკროვანი კულტურების ქვეკომპონენტია. პროგრამის მიხედვით სახელმწიფო ნახევარ ჰექტარამდე ბაღების გაშენებისთვის საჭირო ნერგებსა და წვეთოვან სარწყავ სისტემას 100%-ით აფინანსებს. პროგრამის ფარგლებში სამეგრელოს რეგიონში 250-მა ფერმერმა 470 ჰექტარზე ლურჯი მოცვი უკვე გააშენა.