იუსტიციის მინისტრი თეა წულუკიანი ეხმაურება მედიაში გავრცელებულ ინფორმაციას იმის შესახებ , რომ იგი შესაძლოა, საკონსტიტუციო სასამართლოს თავმჯდომარედ დაინიშნოს.
წულუკიანის თქმით, საკონსტიტუციო სასამრთლოს მოსამართლედ წასვლას არ აპირებს და წინასაარჩევნო კამპანიაში ძალიან აქტიურად ჩართვას გეგმავს.
იგი ამ შესაძლო გადაწყვეტილების გარშემო გამოთქმული უმწვავესი კრიტიკის ავტორებს მიმართავს:
“მინდა მათ ვუთხრა, ნუ გეშინიათ, მე არ მივდივარ საკონსტიტუციო სასამართლოში. შეგიძლიათ იყოთ მშვიდად, ამაზე საუბარიც არ ყოფილა. მე მაქვს გეგმა, რაც მათთვის კიდევ უფრო უსიამოვნოა, მე ვაპირებ, რომ ამ არჩევნებში, წინასაარჩევნო კამპანიაში ძალიან აქტიურად ვიყო ჩართული. თუკი მათ შერჩათ ელემენტარული ლოგიკის უნარი, ერთი მეორეს გამორიცხავს. აქედან გამომდინარე, სჯობს, რომ ისინი მოემზადონ წინასაარჩევნო კამპანიისთვის და ეს ანომალიური ენერგია არ დახარჯონ არარსებულ თემებზე. რაც შეეხება სამოსამართლო პოზიციას, მე ევროპულ სასამართლოში ვარ ნამუშევარი და იმ მიდგომას ვიზიარებ, რომ მოსამართლეობა ადამიანმა შეიძლება გაცილებით მოწიფულ ასაკში ისურვოს”, — განაცხადა წულუკიანმა ,,იმედის” ეთერში.