ორსანტიელი ფერმერი შადიმან ხაზალია ერთ-ერთია მათ შორის, ვინც წინა წლებში ფიქრობდა, რომ თხილის გადარჩენა შეუძლებელი იყო, თუმცა საბოლოოდ დარწმუნდა, რომ ეს კულტურა შესაბამისი მოვლის პირობებში საუკეთესო მოსავალს იძლევა.

თხილის მწარმოებელთა ასოციაციამ შადიმან ხაზალიას თხილის შესაწამლი აპარატი გადასცა და პრეპარატებიც შეღავათიან ფასში მიიღო, რაც თხილის მოსავალზე აისახა.

სპეციალისტებმა გარდა ფაროსანსა, თხილში უამრავი დაავადება აღმოაჩინეს, რომელსაც საერთაშორისო ექსპერტების დახმარებით უკვე რამდენიმე წელია ებრძვიან. ფერმერი ამბობს, რომ საკუთარ ნაკვეთზე მან ინდივიდუალური მიდგომა გამოიყენა და თხილის შეწამვლა დაწესებულ აგროვადებზე ადრე დაიწყო. აგრონომი როლანდ ხაზალია აცახდებს, რომ წელს აგროვადები  ამინდის გამო დაირღვა, თუმცა, ფერმერებმა შეძლეს ამ დრომდე- 5 -6 წამლობის ჩატარება. მთავარი პრობლემა მეთხილე-ფერმერებს კორონავირუსმა შეუქმნა, დაწესებული შეზღუდვების გამო ვერ ხერხდებოდა გადაადგილება და წამლის შეძენა, თუმცა თხილის მწარმოებელთა ასოციაციამ მეთხილეებისთვის სპეციალური მოძრავი აგრომაღაზია შექმნა და პრეპარატები ფერმერებს სოფლებში ადგილზე მიაწოდა. გადარჩა თუ არა საბოლოოდ თხილი, ჯერჯერობით რთული სათქმელია,  ფერმერები და აგრონომები თანხმდებიან, რომ ჯერ ბოლომდე არც ფაროსანა გამქრალა და სხვადასხვა დაავადებები, რომელიც თხილს აქვს, მუდმივად წამლობას საჭიროებს. მავნებელი ფაროსანას სახით  საქართველოში  2016 წელს გავრცელდა და თხილის მოსავალი დააზიანა, მას შემდეგ სახელმწიფომ აქტიურად დაიწყო ფაროსანას წინააღმდეგ ბრძოლა, რის შედეგადაც შარშან მავნებელი საგრძნობლად შემცირდა და თხილის მოსავალიც გაიზარდა. ფერმერებმა გასულ წელს ხარსხიანი თხილი მიიღეს და ფასიც 6-8 ლარამდე გაიზარდა.