ჰომოფობიასთან და ტრანსფობიასთან ბრძოლის დღესთან დაკავშირებით ევროკომისიის შენობა ლგბტ დროშის ფერებში განათდა.
“ყველას შეგვიძლია, შევიტანოთ ცოტაოდენი ცისარტყელა ჩვენს ცხოვრებაში.
ჩვენი მთავარი ოფისის შენობა ასე განათდა, რათა აღვნიშნოთ ჩვენი მრავალფეროვნება და ღირებულებები, და ჰომოფობიასთან, ბიფობიასთან და ტრანსფობიასთან ბრძოლის დღე.
ევროპა ყოველთვის დაიცავს თქვენს ფუნდამენტურ უფლებებს და თავისუფლებებს. ჩვენ თანასწორთა გაერთიანება ვართ”.
თბილისის მერია ანძის განათების პრინციპს განმარტავს და აცხადებს, რომ 17 მაისს თბილისის ანძა თურქმენეთის დროშის ფერებში უნდა გაანათონ.
“სხვადასხვა ორგანიზაცია, უწყება, საელჩოები მიმართავენ მერიას შესაბამისი წერილით, რის საფუძველზეც, ანძის განათება ხდება.
კონკრეტულად, 17-18 მაისის განათებაზე შემოსულია რამდენიმე ადგილობრივი ორგანიზაციის და ერთიც – მეგობარი ქვეყნის წერილი. შესაბამისად, ჩვენ ვერ დავარღვევთ ტრადიციას და ვერ გამოვტოვებთ ანძის განათებას თურქმენეთის დროშის ფერებში, მათ ეროვნულ დღესასწაულთან დაკავშირებით.
რაც შეეხება მოგვიანებით შემოსული ადგილობრივი ორგანიზაციების წერილებს, მათი იდეური მრავაფეროვნებიდან და მოთხოვნების განსხვავებულობიდან გამომდინარე, მიღებულია ისეთი გადაწყვეტილება, რომლითაც ყველას მიმართ გამოვხატავთ პატივისცემასა და სოლიდარობას – შემდგომ დღეებში ანძა განათდება თეთრად. ამით გვინდა აღვნიშნოთ, რომ ჩვენი ყველა მოქალაქე არის ერთი მთლიანი და არა მსოფლმხედველობის, ან ცხოვრების წესის მიხედვით დანაწევრებული საზოგადოება.
ამ ქვეყანაში ტოლერანტობას ვერასდროს ჩაანაცვლებს შეუწყნარებლობა და ფობიები. ჩვენ ქვეყანაში სამოქალაქო უფლებები და ვალდებულებები ნაწილდება ყველაზე თანაბრად, მათი სექსუალური, ეთნიკური თუ კონფესიური კუთვნილების მიუხედავად” – აცხადებს მერია.
თბილისი პრაიდმა დედაქალაქის მთავრობას სოლიდარობის ნიშნად ანძის ლგბტ დროშის ფერებში განათება სთხოვა. მოგვიანებით, გავრცელდა ინფორმაცია, რომ მართლმადიდებელ მშობელთა კავშირმა მერიას ანძის საქართველოს ეროვნული დროშის ფერებში განათების მოთხოვნით მიმართა.