16 მაისს დადასტურებულ კორონავირუსის ახალ შემთხვევებს შორის ერთერთი ზუგდიდში გამოვლინდა.
დაინფიცირებული ტრაილერის მძღოლია. მან საქართველოს საზღვარი ერევნიდან 17 აპრილს გადმოკვეთა და შემდეგ ორი კვირა თვითიზოლაციაში იყო, თუმცა კორონავირუსი თვითიზოლაციის დასრულების შემდეგ გამოუვლინდა.
თვითიზოლაციის დასრულების შემდეგ ის მუშაობდა შიდა გადაზიდვებზე, რა დროსაც იმყოფებოდა თბილისსა და მარნეულში.
ზუგდიდის საზოგადოებრივი ჯანდაცვის ცენტრის დირექტორის, ნანა ოდიშარიას თქმით, მას დაავადება 9 მაისს მაღალი ტემპერატურით დაეწყო და თვითმკურნალობას იტარებდა, საავადმყოფოს მხოლოდ 14 მაისს მიმართა.
“ის არის ტრაილერის მძღოლი და ჰქონდა უფლება, რომ თვითიზოლაციის დასრულების შემდეგ შიდა გადაზიდვები განეხორციელებინა. რა თქმა უნდა ვიცით ამის შესახებ, რომ იყო თბილისში შიდა გადაზიდვებზე. კონტაქტებსაც ასახელებს და მიმდინარეობს ჩაღრმავებული კვლევა,” – ამბობს ოდიშარია.