შერიგებისა და სამოქალაქო თანასწორობის საკითხებში სახელმწიფო მინისტრის ქეთევან ციხელაშვილის თქმით, სხვადასხვა წყაროთი ოკუპირებულ აფხაზეთის რეგიონში უკვე კორონავირუსით ინფიცირების ორი შემთხვევაა დადასტურებული, თუმცა არ არსებობს აბსოლუტური გარანტია იმისა, რომ ეს ზუსტი მონაცემია. როგორც მან აღნიშნა, ინფიცირებულები ერთმანეთთან დაკავშირებული პირები არიან, რამდენიმე ადამიანი კი კარანტინში იმყოფება. ამასთან, როგორც ქეთევან ციხელაშვილი ამბობს, გაგრაში დე ფაქტო ხელისუფლების წარმომადგენლებმა კომენდანტის საათი გამოაცხადეს.
„ამ მონაცემებზე დაყრდნობით შეგვიძლია ვთქვათ, რომ, რა თქმა უნდა, საფრთხის დონე აწეულია ერთი საფეხურით, რამდენადაც ჩვენი ინფორმაციით, ამ კონკრეტულ პირებს საკმაოდ ბევრი კონტაქტი ჰყავთ და ახლა აუცილებელია, რომ ადგილზე დროულად მოხერხდეს ამ კონტაქტების კვლევა, დროული იზოლირება და შემდგომი გავრცელება შეკავდეს“, – თქვა ციხელაშვილმა.
მინისტრის ინფორმაციით, დღეის მდგომარეობთ საქართველოს კონტროლირებად ტერიტორიაზე აფხაზეთის რეგიონიდან იმყოფება 80-მდე პირი, მათ შორის ერთი კორონავირუსით არის ინფიცირებული. „ინფიცირებულთან კონტაქტში მყოფი პირები, რომლებიც არიან საკარანტინო ზონაში, სხვა პირები, რომლებიც ასევე იმყოფებიან კარანტინში და სხვა სამედიცინო საჭიროების მქონე პირები, რომელთა ტრანსპორტირება ბოლო დღეების განმავლობაში მოხდა. ძალიან მნიშვნელოვანია, რომ ადამიანებს, რომლებსაც სჭირდებათ და აქვთ სურვილი, ჰქონდეთ წვდომა კონტროლირებად ტერიტორიაზე, რადგან ჩვენ არა მხოლოდ მზად ვართ, არამედ კონკრეტული ნაბიჯებია გადადგმული, ვეხმარებით მოსახლეობას მათთვის მნიშვნელოვანი ჯანმრთელობის სერვისებით. რუხის კლინიკა ფაქტობრივად მზადყოფნაშია, პირველ ეტაპზე როგორც საკარანტინო სივრცე და რამდენიმე დღეში უკვე როგორც COVID-19-ით ინფიცირებული პაციენტების მართვის ერთ-ერთი მსხვილი ცენტრი რეგიონში“, – აღნიშნა ქეთევან ციხელაშვილმა.