საპატრიარქომ ტაძრებში დეზინფექციის ჩატარების თხოვნით მიმართა დაავადებათა კონტროლისა და საზოგადოებრივი ჯანმრთელობის ეროვნულ ცენტრს.
როგორც ცენტრის ხელმძღვანელმა, ამირან გამყრელიძემ განაცხადა, მან უკვე მისცა შესაბამისი დავალება გარემოს ჯანმრთელობის დეპარტამენტს, თუმცა ეკლესიებში სადეზინფექციო სამუშაოების ჩატარებაში დახმარებას კერძო კომპანიებს სთხოვს.
„ტელეფონით მელაპარაკა საპატრიარქო ამ საკითხთან დაკავშირებით. დავალება მივეცით დაავადებათა კონტროლის ეროვნული ცენტრის გარემოს ჯანმრთელობის დეპარტამენტს. იქ ხდება სადეზინფექციო ხსნარების და ნივთიერებების რეგისტრაცია. მათ ვთხოვე, რომ დაკავშირებოდნენ კომპანიებს, ქველმოქმედების წესით ხომ არ შეუძლიათ საპატრიარქოს დაეხმარონ ამ საკითხში. ზოგადად, კარგია, რომ სოლიდარობა გაჩნდა ქვეყანაში და ძალიან ბევრმა ბიზნესმენმა გამოთქვა დახმარების სურვილი. ასევე გარემოს ჯანმრთელობის დეპარტამენტის საშუალებით იმ კომპენიებს, ვინც არეგისტრირებენ ამ ნივთიერებებს, რომ მიეხმარონ დედა ეკლესიას და ქველმოქმედების წესით მიაწოდონ ეს საშუალებები. რამდენად წამოვლენ ისინი ამ ქველმოქმედებაზე, ჯერ არ ვიცი“, – განაცხადა გამყრელიძემ.
ამ დროისთვის საქართველოში კორონავირუსის 15 შემთხვევა დადასტურდა.