საქართველოს მთავრობის წევრები არ ადასტურებენ ინფორმაციას მინისტრთა კაბინეტში მოსალოდნელი საკადრო ცვლილებების შესახებ.

მას შემდეგ, რაც 27 იანვარს ცნობილი გახდა, რომ ლევან იზორია დაზვერვის სამსახურის უფროსის თანამდებობას ტოვებს და გერმანიაში ელჩად ინიშნება, მედიასაშუალებებით გავრცელდა ცნობები, რომ უახლოეს ხანში ამ პოსტს დაიკავებს მოქმედი პრემიერ-მინისტრი გიორგი გახარია, მთავრობის მეთაურად კი ბიძინა ივანიშვილი დაბრუნდება.

„არასწორი ინფორმაცია გაქვთ“, – უთხრა დღეს, 28 იანვარს ჟურნალისტებს რეგიონული განვითარებისა და ინფრასტრუქტურის მინისტრმა, ვიცე-პრემიერმა მაია ცქიტიშვილმა.

მთავრობაში საკადრო ცვლილებებს არ ადასტურებს ეკონომიკისა და მდგრადი განვითარების მინისტრი ნათია თურნავა: „ვფიქრობ, რომ ეს არის აგორებული შავი პიარი იმ მიზნით, რომ წარმოჩინდეს, თითქოს, რაღაცა ხდება, არასტაბილურობა სამთავრობო გუნდში, რაც არის ტყუილი, მეგობრებო! ძალიან კარგად, შეხმატკბილებულად ვმუშაობთ“.

ნათია თურნავას განცხადებითვე, მთავრობას ძალიან ბევრი საქმე აქვს და ჭორებისთვის არ სცალია.