ირინა ყორშია – წარმატებული მეწარმე ქალი, IRDA-ს დამფუძნებელი და აქტიური ადამიანი. პროფესიით დიზაინერს არ გაჭირვებია ხელოვნებასთან ახლოს ყოფნა, ბავშვობიდან ხატავდა, ქსოვდა, კერავდა, შემდეგ უკვე ეს მისწრაფება რეალობად აქცია და პატარა სახელოსნო გახსნა. ერთადერთი ადამიანია, ვინც ზუგდიდში სუფთა ქართულ ტყავზე მუშაობს. ამბობს, რომ იმდენად სიამოვნებს ეს საქმე, სირთულეებს ვერ ხედავს. IRDA ეს არის დახვეწილი და ორიგინალური აქსესუარები ქალისა და მამაკაცისთვის. ტყავის ზურგჩანთები, ხელჩანთები, წელის ჩანთები, საფულეები, ბროშები, სამაჯურები, საყურეები, ყელსაბამები.გარდა ტყავისა, მუშაობს სუტაჟის ხელოვნებაზე, ერთ-ერთი პროექტის ფარგლებში ეს სხვასაც ასწავლა, რომლებიც დღეს ამ მიმართულებით არიან დასაქმებული.ირინა ყორშია ხშირად იღებს მონაწილეობას გამოფენებში, მომავალში აქვს სხვა გეგმებიც, სახლოსნოს ანაკლიაში გახსნის და ადგილობრივებს იქაც დაასაქმებს.
დიზაინერი ამბობს, რომ ბევრი მის წამოწყებას სკეპტიკურად უყურებდა, რადგან ქალი იყო, თუმცა დაამტკიცა, რომ ქალი სულაც არ არის სუსტი არსება და მასაც შეუძლია აკეთოს ის, რასაც აქამდე მხოლოდ კაცების საქმედ მიიჩნევდნენ. ირინას აზრით, ქალებს გაძლიერება და გვერდში დგომა ჭირდებათ. ცდილობს, თავისი გამოცდილება სხვებს გაუზიაროს და უკვე წარმატებული მეწარმე სხვებზეც ზრუნავს.