ოსი ერის ერთადერთი ეროვნული იდეა ოსეთის რუსეთის შემადგენლობაში შესვლა უნდა იყოს, – ამის შესახებ ე.წ. სამხრეთ ოსეთის დე ფაქტო პრეზიდენტმა, ანატოლი ბიბილოვმა წლის შემაჯამებელ პრესკონფერეციაზე განაცხადა.
„ჩვენი ნაციონალური იდეისთვის, რომელიც განისაზღვრა შორეულ 1700-იან წლებში, ჩვენ დიდი დანაკარგები განვიცადეთ. ამის გამო ვიტანჯეთ 20-იან წლებში, 30-იან წლებში, გასული საუკუნის 90-იან წლებში და ორჯერ 21-ე საუკუნეში. ეს იდეა იყო ერთიანი ოსეთი რუსეთის იმპერიაში, რომელიც დღეს რუსეთის დეფერაციაა“,-განაცხადა ბიბილოვმა.
მისივე თქმით, მშვიდი ცხოვრება, კარგი ხელფასები და განვითარების შესაძლებლობა ოს ხალხს უფლებას არ აძლევს დაივიწყოს ან შეცვალოს ეს იდეა.
„არსებობს ისტორიული ძაფი, რომლის ამოღებაც შეუძლებელია. ოსური ეთნიკური ჯგუფი არ ცხოვრობს ერთ პოლიტიკურ და გეოგრაფიულ სივრცეში. დიახ, ჩვენ ვამბობთ, რომ ჩვენ ისედაც ერთიანები ვართ, ერთად ვართ, თუმცა ჯერჯერობით ჩვენ გაყოფილნი ვართ. ვერც ერთი ეროვნული იდეა ვერ განხორციელდება, როდესაც ერი გაყოფილია“,-განაცხადა ბიბილოვმა.