ზუგდიდის დემოკრატიული ჩართულობის ცენტრში გამართულ შეხვედრაზე აღმოსავლეთ–დასავლეთის მართვის ინსტიტუტმა შეხვედრის მონაწილეებს დეტალური ინფორმაცია მიაწოდა საგრანტო კონკურსებზე, რომლებიც თბილისში მოქმედი და რეგიონული არასამთავრობო ორგანიზაციებისთვის გამოცხადდება. აღმოსავლეთ-დასავლეთის მართვის ინსტიტუტი (East-West Management Institute) 2014 წლის ნოემბრიდან ახორციელებს „სამოქალაქო საზოგადოების განვითარებისა და მოქალაქეების ჩართულობის პროექტს“ (ACCESS). პროექტის მიზანია არასამთავრობო ორგანიზაციებსა და მოქალაქეებს შორის თანამშრომლობის გაზრდა და არასამთავრობო ორგანიზაციების გაძლიერება. 8,996, 947 მილიონი აშშ დოლარის ღირებულების 6-წლიანი პროექტს USAID-ი აფინანსებს და პროექტის ადგილობრივი პარტნიორებია „კონსულტაციისა და ტრენინგის ცენტრი“ (CTC) და „სამოქალაქო განვითარების სააგენტო“ (CiDA).