დღეს დილით დადიანების ისტორიულ-არქიტექტურული მუზეუმის თანამშრომლებმა კიდევ ერთი აქცია გამართეს ხელფასების გაზრდის მოთხოვნით. ისინი აცხადებენ, რომ მთავრობას მთი მოთხოვნის დაკმაყოფილებისათვის ვადას პირველ ნოემბრამდე აძლევენ და, თუ ეს მოთხოვნა ამჯერადაც არ იქნა ყურად მიღებული, გაიფიცებიან
მათ გაავრცელეს სპეციალური მიმართვა კულტურის სამინისტროსა და პრემიერ-მინისტრის მისამართით და იმედოვნებენ, რომ რეაგირება მოყვება . ,,გამოვიყენეთ ყველა პლატფორმა შესაბამისი უწყებებისთვის ხმის მისაწვდენად, თუმცა რეაგირება ამდრომდე არ ყოფილა. ახლა, თუ პირველ ნოემბრამდე კონკრეტულ გადაწყვეტილებას არ მივიღებთ, გავიფიცებით, რაც ჩვენი თვითმიზანი ნამდვილად არ არის,”- აცხადებენ ისინი.
შეგახსენებთ, მუზეუმის თანამშრომლებმა თავიანთი მოთხოვნა პირველად 11 ოქტომბერს გაასაჯაროეს და ქვეყნის პრემიერ-მინისტრ გიორგი გახარიას და განათლების, კულტურის და ძეგლთა დაცვის მინისტრ მიხეილ ბატიაშვილს მიმართეს თხოვნით გაითვალისწინონ 2020 წლის ბიუჯეტში მათთვის მიზერული ანაზღაურების გაზრდა. კონკრეტული პასუხის მისაღებად მათ ხელისუფლებას ათდღიანი ვადა მისცეს, რომელიც უკვე ამოიწურა.
განათლებისა და კულტურის სამინისტროდან მათ უპასუხეს, რომ მუშაობენ ამ მიმართულებით, მათ შორის ინფრასტრუქტურის გაუმჯობესების კუთხით, რათა მომავალში მუზეუმს მეტი შემოსავალი ჰქონდეს და ეს თანამშრომელთა ანაზღაურებაზეც აისახოს, მაგრამ მუზეუმის თანამშრომლები ასეთ ზოგად პასუხს კი არა, კონკრეტულ რეაგირებას ითხოვენ.