,,ძაღლი ყეფს ქარავანი მიდის“ – პასუხი ოკუპირებული აფხაზეთიდან ბაბუშერაში მდებარე აეროპორტის შესახებ საქართველოს საგარეო უწყების განცხადებაზე

0
583

,,ძაღლი ყეფს ქარავანი მიდის“- ასე ეხმაურება ოკუპირებული აფხაზეთის ე.წ. საგარეო საქმეთა მინისტრი დაურ კოვე საქართველოს საგარეო საქმეთა სამინისტროს განცხადებას.

“საქართველოს საგარეო საქმეა სამინისტროს განცხადება აფხაზეთსა და სხვა ქვეყნებს შორის საერთაშორისო საავიაციო მიმოსვლის მიუღებლობის თაობაზე არის აფხაზეთის მთელი მსოფლიოსგან იზოლირების მორიგი, უკვე ჩვეული მცდელობა“, – წერს კოვე.

საუბარია განცხადებაზე, რომელიც საქართველოს საგარეო საქმეთა სამინისტრომ მას შემდეგ გაავრცელა, რაც რუსული მედიით გავრცელდა ინფორმაცია, რომ რუსეთი ბაბუშერაში მდებარე აეროპორტის საერთაშორისო ფრენებისთვის გახსნას ცდილობს.

„ოკუპირებული აფხაზეთის რეგიონში (კერძოდ, სოხუმის აეროპორტში) ვერ მოხდება საერთაშორისო ფრენების განხორციელება, ვინაიდან ეს ეწინააღმდეგება საერთაშორისო სამართალს, ICAO-ს წესდებას და საქართველოს კანონმდებლობას,“- აღნიშნავენ საქართველოს საგარეო საქმეთა უწყებაში.

განცხადების თანახმად, ოკუპირებული ტერიტორიების შესახებ საქართველოს კანონით, აფხაზეთის რეგიონსა და მის ზემოთ არსებულ საჰაერო სივრცეზე ვრცელდება საგანგებო მდგომარეობის რეჟიმი, რასაც მხარს უჭერს საერთაშორისო სამოქალაქო ავიაციის ორგანიზაცია.

ამასთან, საგარეო უწყებაში აღნიშნავენ, რომ საქართველოს სატრანსპორტო ადმინისტრაცია გამოიყენებს მის ხელთ არსებულ ყველა ბერკეტს, საერთაშორისო მექანიზმების ჩათვლით, რათა დაცული იქნას ICAO-ს და საერთაშორისო სტანდარტები.

შეგახსენებთ, რომ რუსულ მედიაში 26 ივლისს გავრცელდა ინფორმაცია, რომ სოხუმის აეროპორტს URAS-ის საერთაშორისო კოდი მიანიჭეს. URAS-ის კოდი ენიჭებათ დსთ-ში მყოფ ქვეყნებს. კოდის მინიჭებით სოხუმის აეროპორტი დარეგისტრირდა როგორც როსტოვის საჰაერო ზონა.

წინა სტატიაოპოზიცია სამეგრელოს ყოფილი გუბერნატორის ლევან შონიას დასჯას ითხოვს
შემდეგი სტატია„ანაკლიის კონსორციუმს” სამშენებლო ნებართვით გათვალისწინებული დოკუმენტების წარმოდგენის ვადა გაუხანგრძლივდა
ტელეკომპანია ოდიშის საინფორმაციო სამსახური