ხელისუფლებამ პოლიტიკური დევნა განაახლა. გავრილოვის ღამის შემდეგ გიგი უგულავას საგამოძიებო უწყებაში დაბარებასა და ნიკა მელიაზე ელექტრონული კონტროლის დაწესებას სამოქალაქო სექტორი პოლიტიკურ რეპრესიებად აფასებს და პოლიტიკურად მოტივირებულ დევნად მიიჩნევს.
20 ივნისის ღამის სისხლიანი დარბევასთან დაკავშირებით გიგი უგულავას გარდა, გამოკითხვაზე ირაკლი ოქრუაშვილი და გიორგი ბარამიძეც დაიბარეს.
ოპოზიციის ლიდერები დაკითხვაზე მისვლას არ აპირებენ და გამოძიების შეკითხვებს პასუხს მხოლოდ მაგისტრი მოსამართლის თანდასწრებით უპასუხებენ.
„ერთი კვირის განმავლობაში დისტანციურ გამოკითხვაზე თანახმა ვარ, თუ არა, როცა ჩამოვალ ნებისმიერ დროს თანახმა ვარ. 28-ში დილას ჩავაბარე შს სამინისტროში წერილი, რომ თუ რამე სურდათ ეცნობებინათ დროულად, იმიტომ რომ 2 ივლისს მივემგზავრებოდი, იმის შემდეგ ჩემს ტელეფონზე არანაირი ზარი არ შემოსულა, თუ რამე უნდათ გამაგებინონ დროულად,“-ამბობს ირაკლი ოქრუაშვილი „კურიერთან“ სატელეფონო საუბრისას.
რაც შეეხება ევროპული საქართველოს” ერთ-ერთ ლიდერს გიგი უგულავას, იგი ამბობს, რომ გამოკითხვაზე იქამდე არ მივა, სანამ თავად შს მინისტრს, მისსავე უწყებაში არ გამოკითხავენ. თუკი ეს არ მოხდება, ამ შემთხვევაში გიგი უგულავა გამოკითხვაზე მაგისტრ მოსამართლესთან ერთად მივა. ,,არ ჩავიბარე ის უწყისი, მერე დავემშვიდობე იმ ადამიანებს, ისინი თავის გზაზე წავიდნენ, მე ჩემს გზაზე“ – განაცხადა გიგი უგულავამ.