აფხაზეთის დე -ფაქტო საზღვრთან,  ენგურის ხიდზე მდებარე საკონტროლო-გამშვებ პუნქტთან მუდმივად მოძრაობაა, თუმცა დღეს  მგზავრების უმეტესობის თქმით,  რამდენიმე საათით რიგში ყოფნა მოუწიათ,  თუ რა მიზეზით ეს მათთვის უცნობია.  დაახლოებით ორ წელზე მეტია, რაც ქართულ-აფხაზურ საზღვარზე გამშვები პუნქტების რაოდენობა ექვსიდან ორამდე შემცირდა, ერთი ენგურის ხიდზე მდებარე  გამშვები პუნქტია და მეორე საბერიო -ფახულანის. სანდო წყაროს თქმით, როგორც კი საბერიოში გზის მშენებლობის პროცესი დასრულდება, საბერიო -ფახულანის გამშვები პუნქტიც ჩაიკეტება და მიმოსვლა მხოლოდ ენგურის ხიდზე მდებარე საკონტროლო-გამშვები პუნქტით იქნება შესაძლებელი. ეს ფაქტი, რა თქმა უნდა  ენგურს გაღმა მცხოვრებ ქართველებს  უფრო მეტ პრობლემას შეუქმნის და ენგურის ხიდი  კონფლიქტით გახლეჩილ მხარეებს შორის ოფიციალური მიმოსვლის ერთადერთ შესაძლებლობად დარჩება.