გაეროს მოსახლეობის ფონდის საქართველოს ოფისისა და გაეროს ქალთა ორგანიზაციის ინიციატივით, სამეგრელოს რეგიონში საგანმანათლებლო ტურნე იმართება. ალექსანდრე ლორთქიფანიძის “იავნანა ლილისთვის” (კამპანიისთვის "კაცები ზრუნავენ") და ქართველი ავტორების ზღაპრების კრებული “იყო ერთი გოგო” საგანმანათლებლო ტურნეს ფარგლებში, პატარებს მწერლებმა დათო გორგილაძემ და დიანა ანფიმიადიმ წაუკითხეს და გენდერული თანასწორობის მნიშვნელობაზეც ისაუბრეს.თანამედროვე ქართული ზღაპრების კრებული – „იყო ერთი გოგო“ გაეროს ქალთა ორგანიზაციის ინიციატივით შეიქმნა. იგი 12 პოპულარული ქართველი ავტორის 21 ზღაპარს აერთიანებს. ეს არის ამბები ქალებზე, რომლებმაც საქართველოს ისტორიასა თუ საზოგადოებრივ ცხოვრებაში საკუთარი მნიშვნელოვანი კვალი დატოვეს. ნაწარმოებების პერსონაჟები არიან როგორც ყველასთვის ნაცნობი, ისე ნაკლებად ცნობილი ქალები: კოლხი მედეა, თამარ მეფე, პირველი ქართველი მფრინავი ქალი რუსუდან ჟორდანია, მარო მაყაშვილი, პოეტი ქალი ხვარამზე და სხვები. წიგნში დიანა ანფიმიადის ორი ზღაპარი: „მანანა – გოგო, რომელმაც წიგნში იმოგზაურა“ და „ანას ამბავია“ შესული. ალექსანდრე ლორთქიფანიძის წიგნი „იავნანა ლილისთვის“ (ილუსტრატორი სოფო კირთაძე), რომელსაც პატარებს დათო გორგილაძე წაუკითხავს, კამპანიის „კაცები ზრუნავენ“ ფარგლებში, გაეროს მოსახლეობის ფონდის ინიციატივით შეიქმნა. წიგნი ერთი ჩვეულებრივი ოჯახის ცხოვრებაზე მოგვითხრობს, სადაც დედა და მამა თანაბრად ინაწილებენ შვილების აღზრდის პასუხისმგებლობასა და საოჯახო საქმეებს, სადაც უახლოესი ადამიანები ერთმანეთზე ყოველდღიურად ზრუნავენ და სადაც ჰარმონია ურთიერთგაგებით, საერთო გამოწვევებისა და პრობლემების გააზრებითა და მათი გადაჭრის გზების ერთობლივად ძიებით მიიღწევა.გამოცემის მიზანია, ხაზი გაუსვას, თუ რამდენად მნიშვნელოვანია მამაკაცების, როგორც მზრუნველი მამების, მეუღლეებისა და პარტნიორების ჩართულობა შვილების აღზრდაში და საოჯახო საქმეებში, ქალთა, ბავშვთა, ოჯახების და ზოგადად, საზოგადოების და ქვეყნის კეთილდღეობისთვის და ნამდვილი გენდერული თანასწორობის მისაღწევად. ტურნე ქალთა ისტორიის თვეს და ქალთა საერთაშორისო დღეს – 8 მარტს ეძღვნება. პუბლიკაციები მომზადდა და გამოიცა გაეროს ერთობლივი პროგრამის „გენდერული თანასწორობისთვის“ ფარგლებში, რომელიც შვედეთის მთავრობის ფინანსური მხარდაჭერით ხორციელდება.