შერიგებისა და სამოქალაქო თანასწორობის საკითხებში საქართველოს სახელმწიფო მინისტრის პირველმა მოადგილემ  რუსლან აბაშიძემ სამეგრელო-ზემო სვანეთის რეგიონში აფხაზეთის წარმომადგენლობასთან შეხვედრა გამართა, თუმცა მედიასთან კომენტარი არ გააკეთა. შეხვედრაზე, რომელსაც აფხაზეთის მთავრობის თავმჯდომარის მოვალეობის შემსრულებელი ვახტანგ ყოლბაიაც ესწრებოდა,  ე.წ. საზღვარზე მიმოსვლის გართულებასა და ადამიანის უფლებების დაცვით კუთხით არსებულ ვითარებაზე ისაუბრეს. როგორც აღინიშნა, შეხვედრა გაცნობითი ხასიათის იყო და მედია წინასწარ დააუწყეს, თუმცა მინისტრის მოადგილემ მედიასთან კომენტარის გაკეთება არ ისურვა. რაც შეეხება ვახტანგ ყოლბაიას, მან ჟურნალისტებს განუმარტა, რომ გართულებულ მიმოსვლასთან დაკავშირებით ინფორმირებული არიან და საკითხს საერთაშორისო დონის შეხვედრებზე გაიტანენ. „ჩვენ ვადევნებთ თვალყურს იმას, რაც იქ ხდება. ახალი მოცემულობაა, როცა ერისწყალის იქეთ მცხოვრებ ხალხს გაუჭირდა გადმოსვლა. ჩვენ ვცდილობთ მეტი განგაში ავტეხოთ. სამწუხაროდ ყველაფერი ვერ კეთდება იქ, რაც ჩვენ გვინდა, მაგრამ რაღაცეებს ვაღწევთ. თქვენ იცით, რომ იქ ახლა ეუბნებიან, რომ ან აიღეთ ბინადრომის მოწმობა ან არ მოგცემთ ფორმა 100. რა თქმა უნდა ეს არის მიუღებელი და ჩვენ ამას აუცილებლად გავაპროტესტებთ ამას საერთაშორისო დონეზე“- განაცხადა ვახტანგ ყოლბაიამ. ის ასევე რამდენიმე დღის წინ  ჯუმბერ გოგოხიას გარდაცვალების ფაქტს გამოეხმაურა და აღნიშნა, რომ ეს იქნება ძალიან მწვავედ დასმული შეხვედრებზე. „ამის გამო პასუხი უნდა მოეთხოვოს მათ., ვინც ეს გააკეთა, თუმცა ვიცით ჩვენ ძალიან კარგად, ვინც გააკეთა, ამბობე, რომ აფხაზები არიან, თუმცა ამას აკეთებენ რუსები, რადგან ისინი არიან იქ“- განაცხადა ყოლბაიამ.რუსმა ოკუპანტებმა რამდენიმე დღის წინ 58 წლის ჯუმბერ გოგოხიას ოკუპირებული ტერიტორიიდან ენგურის ხიდზე გადმოსვლის უფლება არ მისცეს.ის შეუძლოდ გახდა და როგორც ახლობლები აცხადებენ, ზუგდიდში გადმოყვანა დაგვიანდა და გარდაიცვალა.