მეუფე გრიგოლი: ,,თუ ეკლესიის ავტორიტეტი ჩამოგვეშალა, ეს საფრთხეს შეუქმნის თვითონ ქვეყნის სტაბილურობას და სახელმწიფოებრიობასაც კი”

0
358
ფოთისა და ხობის მიტროპოლიტმა მეუფე გრიგლმა გუშინ  TV პირველის ეთერში ისაუბრა  ეკლესიის ავტორიტეტის შელახვის საშიშროებაზე მამა გიორგი მამალაძის სკანდალური წერილის გასაჯაროებით. იგი თვლის, რომ  ამ ფაქტს დამაზიანებელი ეფექტი ექნება მთლიანად ქვეყნისთვისაც. თუმცა, პირველ რიგში მეუფის აზრით, წერილის სააშკარაოზე გამოტანით ხელი შეეშლება მსჯავრდებულ დეკანოზის შესაძლო შეწყალებას და ეკლესიის შუამდგომლობის პროცესს. მეუფე გრიგოლი თვლის, რომ მამალაძის საქმეზე აუცილებელია სინოდის წევრებმა იმსჯელონ.
 
"თუ ეკლესიის ავტორიტეტი ჩამოგვეშალა ეს საფრთხეს შეუქმნის თვითონ ქვეყნის სტაბილურობას და მე ვფიქრობ სახელმწიფოებრიობასაც კი.
 
ვილოცოთ იმისთვის რომ დეკანოზ გიორგი მამალაძის ჯანმრთელობა გამოსწორდეს. თუ დამძიმდა ეს ისევ გამოყენებული იქნება ეკლესიის საწინააღმდეგოდ,"
 
 
“რამდენადაც მე ვიცი, დეკანოზ გიორგი მამალაძის შეწყალების მოთხოვნით თუ ამ თემასთან დაკავშირებით ოფიციალური შეკრება არ ყოფილა, მსჯელობა არ ყოფილა ასეთი, მაგრამ ბუნებრივია, რომ ჩვენ როცა ვხვდებით სასულიერო პირები, განსაკუთრებით მღვდელმთავრები, ვსაუბრობთ ამ თემებზე და ჩვენს გულისტკივილს, ჩვენს აზრებს გამოვთქვამთ, შეიძლება მთლად არ ემთხვეოდეს ჩვენი აზრები ერთმანეთს, მაგრამ მე ნამდვილად ვიცი, რომ ეს მზაობა, რომ აღძრულიყო მამალაძის შეწყალების შუამდგომლობის საკითხი, ნამდვილად ვიცი, რომ კათოლიკოს-პატრიარქი ამის მომხრე იყო, ამ შუამდგომლობის აღძვრის საკითხთან დაკავშირებით ძალიან დადებითი დამოკიდებულება გამოხატა, თუმცა, მე ვერ ვიტყვი, კომენტარს ვერ გავაკეთებ, რა გახდა დღევანდელი ამ განცხადების მიზეზი, თუმცა, ეს მდგომარეობა რომელიც ამ საკითხის ირგვლივ განვითარდა და დღემდე ვითარდება, უნდა ვთქვა, რომ მთლად სასურველ და ჯანსაღ ფონს არ ქმნის ” – განაცხადა   მიტროპოლიტმა.  
 
 აქვე შეგახსენებთ, რომ  გუშინ პატრიარქის სამდივნომ პატიმარი მღვდლის შეწყალებაზე საგანგებო ბრიფინგზე უარი თქვა და განმარტა, რომ დეკანოზი ეკლესიას აშანტაჟებს. ამის მიზეზად კი მამა გიორგი მამალაძის სკანდალური წერილი და მისი ძმის პროტესტის ფორმა დასახელდა. დეკანოზ ანდრია ჯაღმაიძის თქმით, საპატრიარქო პატიმრის შეწყალების შუამდგომლობას მხოლოდ იმ შემთხვევაში აყენებს, თუ მსჯავრდებული "თავის წილ დანაშაულს" აღიარებს.
 
წინა სტატიაზუგდიდის ნაწილს დღეს ელ.ენერგიის მიწოდება შეეზღუდება
შემდეგი სტატიამამუკა ხაზარაძე: ჩვენ მზად ვართ კიდევ ერთხელ მივიდეთ შესაბამის საპარლამენტო კომიტეტში, რათა დავაფიქსიროთ ჩვენი პოზიცია საჯარო ტრიბუნიდან
ტელეკომპანია ოდიშის საინფორმაციო სამსახური