ბიძინა გეგიძემ შესაძლოა საპარლამენტო უმრავლესობა დატოვოს.
უზენაესი სასამართლოს მოსამართლეების წარდგენისა და არჩევის საკითხი ჩემთვის ეროვნული ინტერესების ტოლფასი თემაა – ყველაფერი შედეგებზეა დამოკიდებული, – ასე უპასუხა ფრაქცია “ქართული ოცნება – ძლიერი საქართველოსთვის“ თავმჯდომარემ ბიძინა გეგიძემ კითხვას, არის თუ არა ის იმ დეპუტატებს შორის, ვინც უმრავლესობის შემადგენლობიდან შესაძლო გასვლაზე საუბრობს.
“მოსამართლეებთან დაკავშირებული საკითხი ქვეყნის ეროვნული ინტერესების ნიშნულზე ავიყვანე – თამასა არის ეროვნული ინტერესები! ამ ყველაფრის შემდეგ ვერ წარმომიდგენია, რომ პარლამენტში უზენაეს სასამართლოში ასარჩევად მოსამართლეობის კანდიდატების იგივე სია შემოვიდეს. ეს ჩემთვის მიუღებელი იყო პირველივე დღიდან“, – განაცხადა ბიძინა გეგიძემ.
დეპუტატმა აქვე დასძინა, რომ ის იმ შედეგის მისაღებად აპირებს ბრძოლას, რაც პირადად მას პრინციპული ჰგონია.