არსებული ინფორმაციით, კვირის ბოლომდე გაიმართება საპარლამენტო უმრავლესობის შეხვედრა, რომელსაც ბიძინა ივანიშვილიც დაესწრება. სავარაუდოდ ამ შეხვედრაზე გადაწყდებამ დატოვებენ თუ არა გუნდში იურიდიული კომიტეტის უკვე ყოფილ თავმჯდომარეს ეკა ბესელიას
ოპოზიციაში ამბობენ, რომ საპარლამენტო უმრავლესობის დაშლა გარდაუვალია. „ნაციონალური მოძრაობის“ ერთ-ერთი ლიდერის ხატია დეკანოიძის აზრით, უმრავლესობის წევრებს პრინციპები და ღირებულებები არ გააჩნიათ და მათ ბიძინა ივანიშვილი მართავს.
დეკანოიძე ამბობს, რომ მმართველი პარტიის წევრებს შორის დაპირისპირებაც ბიძინა ივანიშვილის კონკრეტული ინტერესების მიზეზია და არა იმის, რომ მმართველი გუნდის რომელიმე წევრი კანონის უზენაესობის სადარაჯოზე დგას.
„რა თქმა უნდა ასეთი უმრავლესობა აუცილებლად დაიშლება, მაგრამ ახლა წარმოჩინდეს ამ უმრავლესობის ნებისმიერი წევრის პოზიცია, რომ ისინი იცავენ ობიექტურ მართლმსაჯულებას ან დგანან კანონის უზენაესობის სადარაჯოზე, რასაკვირველია რბილად რომ ვთქვათ არის ფარსი.
ზუსტად ქალბატონი ბესელიას გადაყენება იურიდიული კომიტეტის თავმჯდომარეობიდან უკავშირდება ბიძინა ივანიშვილის კონკრეტულ ვიწრო ინტერესს,“-აცხადებს დეკანოიძე.
მოსამართლეთა უვადოდ გამწესებასთან დაკავშირებით დეკანოიძე აცხადებს, რომ მოსამართლეთა 10-კაციან სიაში წარდგენილი კანდიდატების ნაწილი მისთვის მიუღებელია და სიაზე მსჯელობა უნდა დაიწყოს. თუმცა ამავე დროს იურიდიულ საკითხთა კომიტეტის ყოფილ თავმჯდომარეს აკრიტიკებს და აცხადებს, რომ მისთვის გაუგებარია, რატომ დუმდა და ამ დრომდე არ გამოუთქვამს პროტესტი სასამართლო სისტემაში არსებულ პრობლემებთან დაკავშირებით.
„ბესელია ახლა გამოდის უკვე სასამართლოს და კანონის უზენაესობის სადარაჯოზე, როდესაც 7 წელი მას არ შექმნია მას არავითარი მორალური თუ ზნეობრივი დისკომფორტი, როდესაც ამ მოსამართლეების გარემოცვაში მუშაობდა და არც მაშინ, , როდესაც პოლიტპატიმრების სიაში ჩასვა ჯაშუშები, ამიტომ, ყველაფერი ეს არის ფარსი, თუმცა, ასეთი ერთობლიობა ადამიანების აუცილებლად დაიშლება,“ – განაცხადა ხატია დეკანოიძემ.