გაერთიანებული ოპოზიციის პრეზიდენტობის კანდიდატი უსაფრთხოების ექსპერტებს შეხვდა

0
509
გაერთიანებული ოპოზიციის პრეზიდენტობის კანდიდატი უსაფრთხოების ექსპერტებს შეხვდა.  შეხვედრა "საქართველოს სტრატეგიული ანალიზის ცენტრში" გაიმართა.
 
გრიგოლ ვაშაძემ და ანალიტიკოსებმა ისაუბრეს ყველა იმ დეტალზე, რომელიც ქვეყნის უსაფრთხოებას ეხება.
 
 „უმაღლესი მთავარსარდალია პრეზიდენტი და  თავდაცვის შეიარაღებული ძალების რეფორმირების კოორდინაცია, ასევე ომის შემთხვევაში და კრიზისების მართვა ახალი კონსტიტუციით მის ფუნქციებში შედის და ჩემი აზრით მნიშვნელოვანია, რომ ჩვენც გავიცნოთ და გავიგოთ მომავალი მთავარსარდლის ხედვა, თუ რა ხედვები აქვს, საით უნდა წავიდეთ, რა მიმართულებით უნდა განვითარდეთ და როგორ უნდა დალაგდეს ისე სისტემა, რომ პრეზიდენტსა და მთავრობას შორის იყოს იმიტომ, რომ კონსტიტუციაში საკმაოდ ბუნდოვნად არის უსაფრთხოების სფერო გაწერილი, ბევრი რამე საერთოდ არ არის გაწერილი,“ – აცხადებს საქართველოს სტრატეგიული ანალიზის ცენტრის ხელმძღვანელი, ნოდარ ხარშილაძე.
 
ექპერტ თორნიკე შარაშენიძეს თქმით, ხელისუფლება დღემდე ვერ ჩამოყალიბდა სამხედრო სამსახურზე, უნდა იყოს თუ არა ის სავალდებულო. ექსპერტმა ხაზი გაუსვა იმას, რომ მთავრობების დაპირებები პოლიციის დეპოლიტიზირებასთან დაკავშირებით უშედეგოა და ჯამში ყოველთვის პოლიტიკურ პოლიციას ვიღებთ.
 
„ჩვენი სახელმწიფო დღემდე ვერ ჩამოყალიბდა იმაზე, უნდა იყოს თუ არა სავალდებულო სამხედრო სამსახური, რა ჯობია საკონტრაქტო სისტემა თუ სავალდებულო სისტემა. კიდევ უფრო მწვავე ე.წ. მუდმივი სუს-ის საკითხი, რაც არ უნდა გვპირდებოდეს ხოლმე ჩვენ ხელისუფლებები, რომ მოხდება დეპოლიტიზირება პოლიციის და უსაფრთხოების სამსახურები დაკავებულები იქნებიან თავისი ნამდვილი ფუნქციებით, მაინც ჯამში ვიღებთ ჩვენ ყოველთვის პოლიტიკურ პოლიციას, ანუ კაგებეს გაგრძელებას. აი ეს ერთხელ და სამუდამოდ უნდა აღმოიფრქვას,“ – განაცხადა თორნიკე შარაშენიძემ.
 
შეხვედრას ასევე ესწრებოდა "რესპუბლიკური პარტიის" წარმომადგენელი თამარ კორძაია. მან განაცხადა, რომ ახალი პრეზიდენტის არჩევისთანავე ახალი კონსტიტუცია ამოქმედდება, რომელიც არაფერს კონკრეტულს არ გვთავაზობს უშიშროების საკითხებთან დაკავშირებით.
 
„უახლოეს დღეებში უკვე ახალი პრეზიდენტი გვეყოლება, ახალი კონსტიტუცია ამოქმედდება და ჩვენ ეს კონსტიტუცია საერთოდ არ გვთავაზობს არაფერს კონკრეტულს უშიშროების საკითხებთან დაკავშირებით. პრობლემური განსაკუთრებით არის ის, რომ გვეყოლება პირდაპირი წესით არჩეული პრეზიდენტი, რომელსაც უფლებაც კი არა აქვს საგანგებო ან საომარი მდგომარეობა გამოაცხადოს მთავრობის ასე ვთქვათ თანხმობის გარეშე. ქვეყანას, რომლის ტერიტორიების 20% არის ოკუპირებული, არა აქვს იმის უფლება, რომ ასეთი ვაკუუმი დატოვოს კანონმდებლობაში,“ – განაცხადა თამარ კორძაიამ.
 
ექსპერტები აცხადებენ, რომ  მზად არიან შეხვედრა გამართონ „ქართული ოცნების“ კანდიდატთან და მოისმინონ მისი პოზიცია და ხედვები ამ საკითხზე.
წინა სტატია,,ამორალურობაც არის და ამორალურობაც. ყველას ძალიან შეგრცხვებათ, ვინც ჯერ კიდევ ვერ ხვდებით, რა იკადრა ზურაბიშვილმა და მისმა ვაჟმა…”- სოციალურ ქსელში აფეთქებაა
შემდეგი სტატიაკახი კალაძე გორჯესტანის გამოხდომის შემდეგაც სალომე ზურაბიშვილის ოჯახის მიმართ შეურაცხყოფაზე ლაპარაკობს
ტელეკომპანია ოდიშის საინფორმაციო სამსახური