რესპუბლიკური პარტიის პოლიტიკური მდივანი კიდევ ერთხელ განმარტავს იმ არჩევანს, რომლის მიხედვითაც პარტიამ მხარდაჭერა გამოუცხადა გაერთიანებული ოპოზიციის საპრეზიდენტო კანდიდატს.
თამარ კორძაიას განცხადებით, როდესაც ამომრჩეველი განსაზღვრავს ორ არჩევანს, ამ დროს პარტია იღებს იმ გადაწყვეტილებას, რომელიც ოპოზიციური კანდიდატის შანსებს გააორმაგებს.
მისივე თქმით, ქვეყანას სჭირდება ცვლილებები და მისი გატარება შეუძლია მხოლოდ ოპოზიციურ კანდიდატს.
„სალომე ზურაბიშვილის არის უკან სვლა, გრიგოლ ვაშაძე არის არჩევანი განვითარებისკენ,“ – განაცხადა თამარ კორძაიამ.
რაც შეეხება ბიძინა ივანიშვილის მიმართვას, თამარ კორძაიას განცხადებით, ყოფილ პრემიერი ამ ქვეყნის ოპოზიციურ ძალებს მოძალადეებად მოიხსენიებს და ეს ნიშნავს, რომ ის ხალხის არჩევანს არ უწევს ანგარიშს.
„თურმე პოლიტიკური პარტიები ქვეყანაში არიან მოძალადეები. დღეს ჩვენ დავინახეთ რეალურად ბიძინა ივანიშვილი, რომელიც არის შეძრწუნებული იმით, რაც მიიღო. მან დაინახა სიმართლე და ის ახლა სწორ გამოსავალს კი არ ეძებს, პირიქით, ჩიხში შეჰყავს და სურს, რომ ის შიში, რაც მან განიცადა საზოგადოების გადაწყვეტილებით, გადასდოს მის მომხრეებს და დააპირისპიროს საზოგადოება. მან თავის გამოსვლით დანაშაულებრივი ნაბიჯი გადადგა. ის მზად არის, თავისი შიშის დასაძლევად დაუპირისპიროს საზოგადოება ერთმანეთს,“ – განაცხადა თამარ კორძაიამ.
მისივე თქმით, ქართული ოცნება 6 წელია, აყვედრის მოქალაქეებს, რომ, თითქოს, ისინი გადაარჩინეს, ამიტომ უმჯობესი იქნება, თუ დაანებებენ თავს 9 წელზე ლაპარაკს და მიხედავენ რეალური პრობლემებს.