მთელი საარჩევნო კამპანიის განმავლობაში და კენჭისყრის დღესაც დაფიქსირდა რამდენიმე ხარვეზი, კერძოდ, ადმინისტრაციული რესურსის ბოროტად გამოყენება, კერძო მედიასაშუალებების მკვეთრი პოლარიზება, ნეგატიური აგიტაცია და უხეში რიტორიკა, – ამის შესახებ საქართველოში ჩატარებულ საპრეზიდენტო არჩევნებთან დაკავშირებით, ევროკავშირის საგარეო საქმეთა და უსაფრთხოების პოლიტიკის/ევროპის სამეზობლო პოლიტიკისა და გაფართოების მოლაპარაკებათა საკითხებში პრესმდივნის მაია კოჩიანჩიჩის განცხადებაშია ნათქვამი.„28 ოქტომბერს საქართველოში საპრეზიდენტო არჩევნების პირველი ტური ჩატარდა.
OSCE/ODIHR-ის სადამკვირვებლო მისიის წინასწარი შეფასებით, არჩევნები „კონკურენტული და პროფესიონალურად ჩატარებული“ იყო, საქართველოს მოსახლეობას კი საკუთარი არჩევანის დაფიქსირების საშუალება ჰქონდა. მთელი საარჩევნო კამპანიის განმავლობაში და კენჭისყრის დღესაც დაფიქსირდა რამდენიმე ხარვეზი, კერძოდ, ადმინისტრაციული რესურსის ბოროტად გამოყენება, კერძო მედიასაშუალებების მკვეთრი პოლარიზება, ნეგატიური აგიტაცია და უხეში რიტორიკა. ეს ხარვეზები OSCE/ODIHR-ის რეკომენდაციების საფუძველზე უნდა აღმოიფხვრას“, – აღნიშნულია განცხადებაში.მათივე განცხადებით, მთელი საარჩევნო პროცესის განმავლობაში, მათ შორის მეორე ტურის დროს მაღალი დემოკრატიული სტანდარტების უზრუნველყოფა ძალიან მნიშვნელოვანია, ყველა მხარემ უნდა დაიცვას დემოკრატიული პრინციპები და პატივი სცეს ქართველი ხალხის არჩევანს.
„ევროკავშირი მხარს უჭერს დემოკრატიულ, სტაბილურ და წარმატებულ საქართველოს, რომელშიც სამოქალაქო საზოგადოება აქტიურ როლს შეასრულებს. მოუთმენლად ველით საქართველოსთან თანამშრომლობის გაღრმავებას პოლიტიკური ასოცირების და ეკონომიკური ინტეგრაციის წინ წასაწევად და ასოცირების ხელშეკრულებით გათვალისწინებული ვალდებულებების შესასრულებლად“, – ნათქვამია მაია კოჩიანჩიჩის განცხადებაში.