ბიძინა ივანიშვილმა  გუშინდელ ინტერვიუში პრაქტიკურად დაადასტურა, რომ ე.წ. სარდაფის ინციდეტისა და ფარცხალაძის მიერ ყიფიანის ცემის შესახებ ის საქმის კურსში იყო, თუმცა გაკვირვებას გამოთქვამს – რატომ უნდა დაისაჯოს ფარცხალაძე. ბიძინა ივანიშვილი "ომეგა ჯგუფის" დამფუძნებელთან ზაზა ოქუაშვილთან შეხვედრებსაც ადასტურებს, თუმცა ბრალდებას 4 მილიონი დოლარის გამოძალვის შესახებ უარყოფს.

 

"ფარცხალაძე რატომ უნდა დავსაჯო გაუგებარია, ან ბიზნესმენებთან შეხვედრა რატომ არის ესეთი აქცენტით გაკეთებული რომ ეს თავშივე დანაშაულს შეიცავს. არსად არ ჩანს რომ მე დავსაჯე, ან ვინმემ დასაჯა. არ გაქვს საფუძველი იმის რომ კაცი დაისაჯოს და დასჯას ითხოვთ ჟურნალისტი უკვე. 

 

"რუსთავი 2"-ის ჟურნალისტმა, ეკა კვესიტაძემ ბიძინა ივანიშვილს შეახსენა ოთარ ფარცხალაძის ქონებრივი მდგომარეობა იმ პერიოდში, როდესაც ის პროკურორი გახდა, ეს იყო ბინა ჯანაშიაზე და იპოთეკური სესხი 150 ათასი დოლარის ოდენობით. კვესიტაძემ განმარტა, რომ დღეს უკვე მისი ქონება მხოლოდ თბილისში 8 ბინამდე და კომპანიაში უზარმაზარ წილებამდე გაიზარდა და ეს სულ 2 წელიწადში. ამ ინფორმაციაზე ბიძინა ივანიშვილმა "რუსთავი 2"-ს ტრადიციულად ბრალი დასდო სიცრუეში და აღნიშნა, რომ მისთვის ეს არაფერს არ წარმოადგენს.   

 

"თქვენი ტელევიზია არის სიცრუის ტელევიზია და 99% თქვენი ტელევიზიიდან მოდის სიცრუე. შესაბამისად თქვენი დასმული კითხვები ასეთ რაკურსში როგორც თქვენ მოიტანეთ ჩემთვის აბსოლუტურად არაფერს არ წარმოადგენს. რაც შეეხება ფარცხალაძეს, მასზე გამოძიება გრძელდება, ჩამოსულები არიან დაქირავებული პროკურორებიც, რომ უფრო საფუძვლიანი იყოს და მასზე ყველა კითხვას გაეცეს პასუხი,"-აცხადებს ივანიშვილი.