"2018-2019 სასწავლო წლისათვის დაწყებით საფეხურზე, I-დან V კლასამდე, ცვლილებები იგეგმება;
ახალ სახელმძღვანელოებთან ერთად იცვლება საგაკვეთილო საათების ხანგრძლივობა და V კლასში მოსწავლეს შეეძლება სკოლის მიერ შეთავაზებული ორი უცხო ენა შეისწავლოს. V კლასის პირველ სემესტრში მოსწავლის განმსაზღვრელი შეფასების კრიტერიუმი გაუქმდება და შემაჯამებელი დავალებებიც შემცირდება" – აცხადებს განათლებისა და მეცნიერების მინისტრის მოადგილე ლია გიგაური.
"II კლასში 5 წუთით შემცირდა გაკვეთილების ხანგრძლივობა. პირველ კლასში ეს დრო 35 წუთია, მეორე კლასში – 40 წუთი გავხადეთ და შემდგომ უკვე 45-წუთიან საგაკვეთილო რეჟიმზე გადავლენ მოსწავლეები.
იცვლება შეფასების სისტემაც. V კლასის პირველ სემესტრში მოსწავლეები არ შეფასდებიან ქულებით. ამასთან, მასწავლებლებს აღარ მოუწევთ საშინაო დავალებების შეფასება, ისინი ორიენტირებულნი იქნებიან განმავითარებელ შეფასებაზე.
გარდა ამისა, მთლიანად დაწყებით საფეხურზე (I-VI კლასებში) მასწავლებლებს აღარ მოუწევთ საშინაო დავალებების ქულებით შეფასება. შეფასებები მხოლოდ საკლასო აქტივობებში იქნება თუმცა საშინაო დავალებები ექნებათ, მაგრამ უფრო მცირე მოცულობის, რადგან მასწავლებელმა მოსწავლესთან კლასში უნდა იმუშაოს"
მისივე თქმით, "მეორე უცხო ენასთან დაკავშირებით არის ვალდებულება, რომ მეხუთე კლასში სკოლამ მოსწავლეს არ შესთავაზოს მხოლოდ ერთი უცხოური ენა, არამედ მისცეს საშუალება, რომ მოსწავლეებმა აირჩიონ კიდევ ერთი ევროპული უცხოური ენა, რომელსაც სახელმწიფო სრულად დააფინანსებს, რაც აგრეთვე მნიშვნელოვანი ცვლილებაა" – განაცხადა ლია გიგაურმა.