სმიტების ოჯახის სამი წევრის, მათ შორის მცირეწლოვანი ბავშვის მკვლელობაში ბრალდებულის, მალხაზ კობაურის ადვოკატები მის გათავისუფლებას ითხოვენ. როგორც ადვოკატმა ალუდა ბუჩუკურმა აღნიშნა, არ უნდა დაკმაყოფილდეს პროკურატურის შუამდგომლობა კობაურისთვის აღკვეთის ღონისძიების სახით პატიმრობის შეფარდებაზე. ამასთან, ბრალდებულის მეორე ადვოკატმა მურმან ნიკოლეიშვილმა აღნიშნა, რომ ბრალდება ერთ ჩვენებაზეა აგებული, რომელიც ბრალდებულს გაურკვეველ ვითარებაში აქვს მიცემული.
"ბრალდება აგებულია ბრალდებულის ერთ ჩვენებაზე, რომელიც გაუგებარია რა ვითარებაში მისცა. პროკურატურას ამ ჩვენებიდანაც მხოლოდ ის ნაწილები აქვს გამოყენებული, რაც ბრალდებისთვის იყო სასარგებლო. საქმეში არსებული მტკიცებულებები ვერ აკმაყოფილებს მინიმალურ სტანდარტებს და ვერ ადასტურებს ბრალდებულის მიერ დანაშაულის ჩადენას. ამიტომ, არ უნდა დაკმაყოფილდეს ბრალდების შუამდგომლობა და მალხაზ კობაური უნდა გათავისუფლდეს პატიმრობიდან", – განაცხადა მურმან ნიკოლეიშვილმა.
პროკურატურა სმიტების ოჯახის სამი წევრის მკვლელობაში ბრალდებულისთვის აღკვეთის ღონისძიების სახით პატიმრობის შეფარდებას ითხოვს. პროკურორმა დავით ყაზარაშვილმა შესაბამისი შუამდგომლობის საფუძვლად ახალი დანაშაულის ჩადენის, მოწმეებზე ზემოქმედებისა და მიმალვის საფრთხეები დაასახელა.
როგორც პროკურორმა აღნიშნა, ბრალდებული მალხაზ კობაური საქმეზე მოწმის სახით დასაკითხ პირთა უმეტესობას იცნობს და არსებობს საფრთხე, რომ მოხდეს მოწმეეებზე ზემოქმედება ან მათი მოსყიდვა.
რაც შეეხება მიმალვის საფრთხეს, როგორც დავით ყაზარაშვილმა განმარტა, ბრალდებული წარმოშობით ახალგორიდანაა, იქ გააჩნია საცხოვრებელი და სისტემატურად ჩადის იქ. აქედან გამომდინარე, ბრალდების მხარე მიიჩნევს, რომ თავისუფლებაზე ყოფნის შემთხვევაში შესაძლოა, ის ოკუპირებულ ტერიტორიაზე მიიმალოს.
რაც შეეხება დანაშაულის სხვა პირების მიერ ჩადენის შესახებ დაკავებულის განცხადებას, ბრალდების მხარე მიიჩნევს, რომ ეს ბრალდებულის მიერ პასუხისმგებლობის თავიდან არიდების მცდელობაა, რის გამოც მან არაერთხელ სცადა გამოძიებისთვის ხელის შეშლა და სხვადასხვა სახის ინფორმაციის გავრცელება.
ამ წუთებში ვრცელდება იფორმაცია, რომ მალხაზ კობაურს აღკვეთის ღონისძიების სახით პატიმრობა შეეფარდა.