შეხვედრა შსს – ში: საბოლოო გადაწყვეტილება „მესტია ჭალა-1“ და „მესტია ჭალა-2“ – თან დაკავშირებით მიღებულია

0
447
შინაგან საქმეთა მინისტრის პირველმა მოადგილემ, კახა საბანაძემ ეკონომიკისა და მდგრადი განვითარების, ასევე, გარემოს დაცვისა და სოფლის მეურნეობის მინისტრების მოადგილეებთან, ინვესტორებსა და სვანეთის ადგილობრივ მოსახლეობასთან სამუშაო შეხვედრა გამართა.
 
 შეხვედრაზე სვანეთში მშენებარე ჰესების – „მესტია ჭალა-1“ და „მესტია ჭალა-2“ მშენებლობის უსაფრთხოების საკითხი განიხილეს. მხარეებმა ერთმანეთის პოზიციები მოისმინეს. სახელმწიფო უწყებების წარმომადგენლებმა კიდევ ერთხელ ხაზგასმით აღნიშნეს, რომ არც ერთი ჰიდროელექტროსადგური მთავრობასა და ადგილობრივ მოსახლეობას შორის მჭიდრო კომუნიკაციისა და შეთანხმების გარეშე არ აშენდება.
 
როგორც შინაგან საქმეთა მინისტრის პირველმა მოადგილემ, კახა საბანაძემ განაცხადა, ენერგეტიკული სიმძლავრეების განვითარება არ უნდა მოხდეს მოსახლეობის ნების საწინააღმდეგოდ.
 
 
,,სახელმწიფო ერთი მხრივ, უზრუნველყოფს განვითარებას და მშენებლობის უწყვეტ წარმართვას და მეორე მხრივ, ამ პროცესში მოსახლეობის ინტერესების დაცვას და მათ ჩართულობას. ჩვენ მოსახლეობას მივეცით გარანტია, რომ მათი აზრის გათვალისწინების გარეშე მშენებლობა არ შედგებოდა“, – აღნიშნა მან
 
შსს-ს ინფორმაციით, შეხვედრაზე პოზიციათა გაცვლის შემდეგ ყველა მხარე შეთანხმდა, რომ ეკონომიკური სიმძლავრეების გაზრდასა და ენერგოდამოუკიდებლობას ქვეყნის განვითარებისთვის არსებითი მნიშვნელობა აქვს და მშენებარე ჰესებთან დაკავშირებით საბოლოო გადაწყვეტილება მიიღეს.
 
როგორც უწყებაში აცხადებენ, მშენებარე ჰესების საკითხს საზოგადოების მხრიდან აზრთა სხვადასხვაობა მოყვა. სხვა უწყებებთან ერთად, შინაგან საქმეთა სამინისტრომ ინვესტორებსა და მოსახლეობას შორის მედიატორის როლი შეასრულა.
 
შსს-ს ცნობით, მიმდინარე წლის 1-ელ იანვარს ძალაში შევიდა ახალი საკანონმდებლო ცვლილება, გარემოზე ზემოქმედების შეფასების დოკუმენტის შემუშავებასთან დაკავშირებით, რომლის მიზანია ჰიდროელექტროსადგურების მშენებლობის პროცესი წარიმართოს მთავრობასა და მოსახლეობას შორის ეფექტური, მჭიდრო კომუნიკაციით, მოქალაქეთა მაქსიმალური ჩართულობითა და ადგილობრივი მოსახლეობის უმრავლესობის გადაწყვეტილებით..
წინა სტატიასაქართველოს პრეზიდენტი და პრემიერი – ნაქირავებ ,,ხრუშოვკაში”!
შემდეგი სტატია,,არა აქეთ, არა იქით, არამედ რაღაც სხვა” – ირაკლი კობახიძის ნებოძირი და სერგეენკოს უმორჩილესი თხოვნა
ტელეკომპანია ოდიშის საინფორმაციო სამსახური