,,სასამართლო ჩვენს შუამდგომლობას შუამდგომლობაზე უგულველყოფს. ჩვენ ამჯერადაც ვერ მივიღეთ პასუხი, როგორ უნდა შეიცვალონ ამ პროცესზე მოსამართლეები. ასეთ პირობებში მე ვერ ვხედავ სხდომაზე დასწრების აუცილებლობას. მათ სურთ შექმნან იურიდიული პროცედურის იმიტაცია, ამიტომ იქ მხოლოდ ჩემი იურისტები დარჩებიან. მე გავაგრძელებ სასამართლოებში სიარულს იმ ხალხისთვის, რომელიც აქ ჩემს მხარდასაჭერად მოდის, და ეს ხალხიც მირჩევს არ ვიარო ზევიდან მართულ ასეთ სხდომებზე. ჯობს ეს დრო მოვახმარო ჩვენი და თქვენი გეგმების განხორციელებას, რომელზედაც შევთანხმდით ბოლო მარშის დროს – 18 თებერვალს კიდევ ერთი ასეთი საპროტესტო აქცია გაიმართება – განუცხადა მიხეილ სააკაშვილმა გუშინ, კიევის სააპელაციო სასამართლოში მისი სარჩელის განხილვის დროს შეკრებილ მხარდამჭერებს , როცა გარეთ გამოვიდა .
სააპელაციო სასამართლომ კი საქალაქოს გადაწყვეტილება ძალაში დატოვა და არ აღიარა სააკაშვილი პირად, რომელიც დამატებით დაცვას საჭიროებს. შესაბამისად მიხეილ სააკაშვილმა უკრაინაში ყოფნის ნებადამრთველი სტატუსი დაკარგა.
"ეს სასამართლოს კი არა, პოროშენკოს გადაწყვეტილებაა", – დაწერა საქართველოს მესამე პრეზიდენტმა თავის ფეისბუქ გვერდზე
6 თებერვლის ღამეს მიხეილ სააკაშვილის შინაპატიმრობის მოქმედების ვადა ამოიწურა, – ამის შესახებ საქართველოს ყოფილი პრეზიდენტის ადვოკატმა რუსლან ჩერნოლუცკიმ „ინტერფაქს-უკრაინას“ განუცხადა.
„მიხეილ სააკაშვილს ბრალი პროკურატურამ 5 დეკემბერს წაუყენა. კიევის სააპელაციო სასამართლოს გადაწყვეტილებით, აღკვეთის ღონისძიების მოქმედების ვადა 6 თებერვლის ღამეს იწურება და აღკვეთის ღონისძიება ავტომატურად უქმდება. ამის შემდეგ სააკაშვილის მიმართ არანაირი შეზღუდვები არ მოქმედებს, გარდა იმისა, რომ მან, როგორც ეჭვმიტანილმა, უნდა მიიღოს უწყებები და გამოცხადდეს საგამოძიებო მოქმედებებზე“, – აღნიშნა ადვოკატმა.
მისი თქმით, აღკვეთის ღონისძიების მოქმედების ვადის გასაგრძელებლად გენერალურმა პროკურატურამ უნდა მიმართოს სასამართლოს და წარმოადგინოს არგუმენტები და მიზეზები, თუ რატომ დაირღვა აღკვეთის ღონისძიების გაგრძელების შუამდგომლობის ვადები.
ჩერნოლუცკის განცხადებით, ეს გადაწყვეტილება შესაძლოა უკავშირდებოდეს ხელისუფლების სურვილს „გაასუფთაოს“ პოლიტიკოსის სტატუსი და საქართველოში მისი ექსტრადიცია მოახდინოს.