ხარაგაულში, ბეჟათუბნის სარკინიგზო გვირაბის მშენებლობაზე დასაქმებულები გაიფიცნენ. ასამდე მუშამ სარკინიგზო ხაზისა და გვირაბის მშენებლობა შეაჩერა. ისინი უსაფრთხოების ნორმების გაუმჯობესებას ითხოვენ.
როგორც რკინიგზელთა პროფკავშირის წარმომადგენელმა პაატა ნინუამ განაცხადა, დამსაქმებლის მხრიდან შრომის უსაფრთხოების პირობები არ არის დაცული და მუშაობა მათი სიცოცხლისთვის საფრთხის შემცველია.
,,100-მდე ადამიანი მუშაობს ბეჟათუბნის სარკინიგზო გვირაბის მშენებლობაზე. აქედან 60 ქართველია, დანარჩენი მუშა-ხელი ჩინეთიდან არის. ქართველები სრულად არიან გაფიცული. ისინი ზედმეტს არაფერს ითხოვენ. დამსაქმებელი ვალდებული იყო მოეწესრიგებინა დასაქმებულთა შრომითი პირობები. დასაქმებულები თვლიან, რომ მათ სიცოცხლეს საფრთხე ემუქრება და ამიტომ, დღეს დილიდან გაიფიცნენ," -ამბობს პაატა ნინუა.
,,რკინიგზელთა ახალი პროფესიული კავშირის“ მხრიდან, 2017 წლის ოქტომბერში ინსპექტირებისა და მონიტორინგის შედეგად,აღებული ვალდებულებების შეუსრულებლობის არაერთი ფაქტი გამოვლინდა.
სოფელ ბეჟათუბანში სარკინიგზო გვირაბის მშენებლობას კომპანია "ჩინეთის რკინიგზის 23-ე ბიურო" ახორციელებს.