კიევის ადმინისტრაციულ სასამართლოში მიხეილ სააკაშვილის მოქალაქეობასთან დაკავშირებით დღეს სხდომაა ჩანიშნული – სწორედ ამ პროცესზე უნდა გადაწყდეს, დააკმაყოფილებს თუ არა სასამართლო საემიგრაციო სამსახურის მოთხოვნას – გაუქმდეს 1 დეკემბრის გადაწყვეტილება, რომლითაც სააკაშვილს პირველ მარტამდე განსაკუთრებული დაცვის ქვეშ მყოფის სტატუსი აქვს.სასამართლო სხდომამდე მიხეილ სააკაშვილს, კიევის დროით 11 საათზე უშიშროების სამსახურში დაკითხვაზე ელოდებიან. ამ ფაქტის გამო ადვოკატი სასამართლო პროცესის გადადების შუამდგომლობის დაყენებას აპირებს."მიხეილ სააკაშვილი დღეს უკრაინის უსაფრთხოების სამსახურში დაკითხვაზე მისვლას გეგმავს, სადაც ორ შუამდგომლობას წარვადგენთ. ესენია სისხლის სამართლის საქმის მასალების გაცნობის მოთხოვნა და დაკითხვაზე გამოძახების უწყებასთან დაკავშირებით, უსაფრთხოების სამსახურის მხრიდან პროცესუალური შეცდომების გამოსწორების მოთხოვნა. დღესვე, კიევის საოლქო სასამართლოში მიხეილ სააკაშვილის მიერ საემიგრაციო სამსახურის წინააღმდეგ შეტანილ სარჩელთან დაკავშირებით პროცესია ჩანიშნული. სასამართლოს შუამდგომლობით მივმართავ, სხდომის გადატანის შესახებ. წესით მათ უნდა დააკმაყოფილონ ეს მოთხოვნა, თუმცა ჩვენ გვაქვს ინფორმაცია, რომ სასამართლოს სურს, საქმე ჩვენი მონაწილეობის გარეშე განიხილოს და ჩვენი საწინააღმდეგო გადაწყვეტილება გამოიტანოს," – აცხადებს მიხეილ სააკაშვილის ადვოკატი რუსლან ჩერნოლუცკი.