ქრთამის აღების და სამსახურებრივი უფლებამოსილების ბოროტად გამოყენების ბრალდებით დაკავებულ მარტვილის გამგეობის თანამშრომლებს, გია ჩიხლაძეს და მამუკა კეკელიას ზუგდიდის სასამართლომ აღკვეთის ღონისძიებად პატიმრობა შეუფარდა. გადაწყვეტილება მოსამართლე შოთა ბიჭიამ რამდენიმე წუთის წინ მიიღო. პროკურორ მირანდა წერეთლის განცხადებით, ბრალდების მხარეს, ფარული ვიდეო ჩანაწერთან ერთად, სხვა მტკიცებულებებიც აქვს. თავად დაკავებულები ბრალს არ აღიარებენ. ადვოკატებს მედიასთან კომენტარი არ გაუკეთებიათ. საქმის არსებითი განხილვა ზუგდიდის რაიონულ სასამართლოში 9 იანვარს დაიწყება.ფინანსთა სამინისტროს საგამოძიებო სამსახურის თანამშრომლებმა, ქრთამის აღების და სამსახურებრივი უფლებამოსილების ბოროტად გამოყენების ფაქტზე სამეგრელო-ზემო სვანეთის რეგიონის ერთ-ერთი მუნიციპალიტეტის გამგეობის საფინანსო-საბიუჯეტო და ინფრასტუქტურის, ურბანული განვითარებისა და არქიტექტურის სამსახურების ხელმძღვანელი პირები დააკავეს.გამოძიება მიმდინარეობს საქართველოს სისხლის სამართლის კოდექსის 332-ე და 338-ე მუხლების პირველი ნაწილებით. ამ ეტაპზე, ტარდება შესაბამისი ღონისძიებები დანაშაულში მონაწილე სხვა პირების დადგენა-მხილების მიზნით.