,,საქართველოს გაუმარჯოს” – პრინცმა ჰარიმ ტორონტოს თამაშებზე გამარჯვებულ ქართველ სამხედროებს ოქროს მედლები გადასცა

0
391
კანადაში მიმდინარე საერთაშორისო პარაოლიმპიური ტიპის სპორტულ თამაშებში, სამშვიდობო მისიებში დაჭრილმა ქართველმა სამხედროებმა მჯდომარე ფრენბურთში ოქროს მედლები მოიპოვეს.
გამარჯვებულებს ოქროს მედლები პირადად ბრიტანეთის პრინცმა ჰარიმ გადასცა და  ქართველ სამხედროებთან ერთად წარმოთქვა:  ,,საქართველოს გაუმარჯოს!" 
,,ინვიქტუმ გეიმსი''  გაერთიანებული სამეფოს პრინცის, პრინც ჰარის მიერ არის დაფუძნებული და მისი პატრონაჟით მიმდინარეობს. ამ შეჯიბრებაში   ქართველი სპორტსმენები უკვე მესამედ მონაწილეობენ.  
დაძაბულ, ფინალურ შეხვედრაში ქართველი სამხედროების ნაკრები გაერთიანებული სამეფოს ნაკრებს დაუპირისპირდა და გამარჯვება მოიპოვა. 
 
საქართველოს თავდაცვის სამინისტროს საბრძოლო მოქმედებების დროს და სამშვიდობო მისიებში დაჭრილი და დაშავებული სამხედრო მოსამსახურეებით დაკომპლექტებული გუნდი „ძლიერთა თამაშებში" (Invictus Games) მჯდომარე ფრენბურთის გარდა, სპორტის კიდევ 5 სახეობაში ასპარეზობს: ველორბოლა, ცურვა, წოლჭიმი, მშვილდით სროლა, ავტორბოლა.
 
 
ქართველ სამხედროებს კანადაში მიმდინარე პარაოლიმპიურ თამაშებში გამარჯვება მიულოცა საქართველოს პრემიერ მინისტრმა გიორგი კვირიკაშვილმა. 
,,„დიდი სიხარულით და ამავე დროს სიამაყით მინდა მივულოცო ჩვენს გმირ ბიჭებს კანადაში მიმდინარე საერთაშორისო პარაოლიმპიური ტიპის სპორტულ თამაშებში – Invictus Games-ში გამარჯვება. 
ჩვენმა დაჭრილმა სამხედროებმა მჯდომარე ფრენბურთში ბრიტანეთის ნაკრებს მოუგეს და დამსახურებული ოქროს მედლები მოიპოვეს. კიდევ ერთხელ ვულოცავ მათ ამ გამარჯვებას, სიცოცხლით სავსე, აქტიურ ცხოვრებას და კიდევ ბევრ წარმატებას ვუსურვებ!“, – აღნიშნულია პრემიერ მინისტრის მილოცვაში.
 

წინა სტატიაპრეზიდენტი თავის ადმინისტრაციაში ოპოზიციური პარტიების წარმომადგენლებს ხვდება
შემდეგი სტატიაგულის დღე – ხვალიდან 3 ოქტომბრამდე კარდიოლოგიური სკრინინგი 70%-იანი ფასდაკლებით ჩატარდება
ტელეკომპანია ოდიშის საინფორმაციო სამსახური