მთაწმინდაზე, ვერის სასაფლაოს მიმდებარე ტერიტორიაზე ხანძარია.
მაგრამ მთაწმინდის პარკის ტერიტორიაზე ხანძარი გავრცელებული არ არის, თუმცა, ძლიერი კვამლია, ევაკუაცია არ გამოცხადებულა, თუმცა იგი უკვე დატოვეს დამსვენებლებმა.
ცეცხლი თანდთან ბელინსკის, გოგებაშვილისა და მიმდებარე ქუჩებისკენ მოიწევს. მოსახლეობა ქუჩაშია გამოსული.
ადგილზე მობილიზებული არიან სამაშველო სამსახურის წარმომადგენლები და შს სამინისტროს ძალები, ასევე სასწრაფო დახმარების ბრიგადები. ხანძრის ჩაქრობას ართულებს რელიეფური პირობები, რის გამოც ტექნიკით მუშაობას ვერ ახერხებენ,
ხანძრის ჩაქრობას მაშველებთან ერთად მოსახლეობაც ცდილობს. მცხოვრებლები ხანძრის კერებთან არიან განლაგებული და ნიჩბებითა და ბარებით ცდილობენ ხანძრის ლოკალიზებას.
თბილისის მერის დავით ნარმანიას განცხადებით, ცეცხლი ტყის მასივს ისეთ ადგილზე უკიდია, რომ მოსახლეობას საფრთხე არ ემუქრება. მისივე თქმით, თავდაცვის სამინისტროსთან მიმდინარეობს მოლაპარაკებები და, შესაძლოა, ხანძრის სალიკვიდაციო სამუშაოებში ვერტმფრენიც ჩაერთოს.
შსს საგანგებო სიტუციების მართვის სააგენტოში კი აცხადებენ, რომ ამ ეტაპზე ვერტფრენები ხანძრის ჩაქრობაში მონაწილეობას ვერ მიიღებენ, რადგან ღამით მხედველობის არელი არ არის.
,, ადგილზე მობილიზებულია სახანძრო-სამაშველო ჯგუფების საკმარისი რაოდენობა, რომელთა მუშაობის შედეგად, ხანძრის გავრცელების საფრთხე აღარ არსებობს – აცხადებს იგი. აღნიშნულს ადასტურებენ საგანგებო სიტუაციებს სამსახური და შსს-ს პრესსამსახურიც, მაგრამ ეს ოდნავადაც არ ამშვიდებს მოსახლეობას, რომელსაც ახსოვს მეწყრის ჩამოწოლით ადიდებული ვერეს ნამოქმედარი და ხელისუფლების უუნარობა, არხეინობა თუ ორივე ერთად.
,,მთაწმინდა იწვის და მოსახლეობა ცეცხლის ჩასაქრობად ვერტმფრენს ითხოვს. ისე, ღამის თბილისის განვითარებაზე რომ გვაბოლებენ, ერთი ვერტმფრენი თუ ჰყავთ სადმე მსგავსი სიტუაციებისთვის, თორემ მერე ჭუჭყიან ბოტებს ან ბოტასებს ნუ გამოფენენ დასაბოლებლად…ბოლი ისედაც ასდის ქალაქს''– წერენ სოციალურ ქსელში.
ჯერჯერობით უცნობია, რამდენ კვადრატულ მეტრ ფართობზეა ცეცხლი გავრცელებული, თუმცა, არსებული ინფორმაციით ცეცხლი, სავარაუდოდ, დიდ ფართობს მოიცავს.