5-თვიანი პაუზის შემდეგ განახლდება .მცირე ზომის თვითმფრინავის ფრენები ნატახტრის აეროდრომიდან მესტიის მიმართულებით, – პირველი რეისი 18 ივლისს განხორციელდება. რეგულარული ავიარეისები მესტიისკენ კვირაში სამჯერ – ორშაბათს, ოთხშაბათს და პარასკევს, დღის 11 საათზე შესრულდება. მესტიიდან ნატახტარში გაფრენა კი იმავე დღეებში 14:00 საათზე იქნება შესაძლებელი. რეისებს ჩეხური წარმოების L-410 ტიპის, 15-ადგილიანი საჰაერო ხომალდი შეასრულებს.
ბილეთის ღირებულება 65 ლარი იქნება.
თითოეული გაფრენა კომპანიას 3 100 ამერიკული დოლარი უჯდება. სუბსიდიების პირობებში, მომხმარებელი ბილეთის სრულს ფასს არ იხდის. ფრენებს საქართველოს მთავრობა 4 მილიონიანი სუბსიდიით წაახალისებს.
კონტრაქტი სახელმწიფოსა და საავიაციო კომპანიას შორის 3 წელი გაგრძელდება და ამ სამი წლის განმავლობაში მომხმარებელი ფრენებზე სუბსიდირებულ ფასს მიიღებს.
აღნიშნულ რეისთან დაკავშირებული ტენდერი ქართულმა კომპანიამ, სერვის ეარმა მოიგო, თუმცა, ქეთი ალექსიძის თქმით, ღია ელექტრონულ ტენდერში მხოლოდ ეს ერთი კომპანია მონაწილეობდა.
შეგახსენებთ – 2010 წლის დეკემბერში, როდესაც საქართველოს ყოფილმა პრეზიდენტმა, მიხეილ სააკაშვილმა, თამარ მეფის სახელობის მესტიის აეროპორტი გახსნა, ოპერატორად კანადური კომპანია Ken Borek Air დაინიშნა. ამ პერიოდში დაიწყო რეგულარული რეისების განხორციელება თბილის-მესტია-თბილისი რეისით და მცირე ავიაციის განვითარების პროექტის ფარგლებში სახელმწიფო სუბსიდიას ეს რეისიც იღებდა. მესტიის აეროპორტიდან მგზავრების გადაყვანას ვერტმფრენებიც უზრუნველყოფდნენ, რომლით მგზავრობის ღირებულებაც 50 ლარს შეადგენდა.