ფოთის სავაჭრო ცენტრში ხანძრის შედეგად დაზარალებულები ზარალის ანაზღაურებას მოითხოვენ.
ამ წუთებში ისინი ფოთის ბაზრის ადმინისტრაციასდა ადგილობრივი ხელისუფლების წარმომადგენლებს ხვდებიან. შეხვედრა ხმაურის ფონზე მიმდინარეობს.
„მოვაჭრეთა უმრავლესობას საქონელი მთლიანად გაგვინადგურდა, ნაწილმა გადაარჩინა, მაგრამ პროდუქცია სარეალიზაციოდ არ გამოდგება. ყველას ბანკის ვალი გვაქვს, როგორ უნდა გადავიხადოთ? მთავრობას ვთხოვთ გაგვიწიოს დახმარება,“-განაცხადა დაზარალებულმა ნატო გულუამ.
მოვაჭრეებმა ქალაქის მერს, ირაკლი კაკულიას წინა დღეების დაპირება შეახსენეს.
„რამდენიმე დღის წინ გარევაჭრობის აკრძალვა დაიწყეს, ჩამოიარეს და გვითხრეს, გზა გაათავისუფლეთ და მხოლოდ თქვენს მაღაზიებში ივაჭრეთო, ხანძარი რომ გაჩნდეს, მერე ზარალის ანაზღაურებას მომთხოვთო. აგვინაზღაუროს ახლა,“ – აღნიშნა ერთ-ერთმა დაზარალებულმა.
ირაკლი კაკულიას განცხადებით, ყველა სამსახური მობილიზებულია და აღნიშნული პრობლემის მოგვარების გზებზე მსჯელობენ. მისივე თქმით, მოლაპარაკებები საბანკო სექტორის წარმომადგენლებთანაც მიმდინარეობს.
გუშინ, ფოთის სავაჭრო ცენტრში გაჩენილი ხანძრის შედეგად 2000 კვადრატული მეტრი ფართობი დაიწვა. დაზარალებულებს საკუთარი ბიზნესი დაზღვეული არ ჰქონდათ. ხანძრის გამომწვევი მიზეზების დასადგენად გამოძიება მიმდინარეობს