საქართველოს პრეზიდენტმა გიორგი მარგველაშვილმა დღეს ზუგდიდში, ე.წ. კომბინატის დასახლებაში მეორე მსოფლიო ომში დაღუპულთა მემორიალი გვირგვინით შეამკო და დაღუპულთა ხსოვნას პატივი მიაგო.
მანამდე, პრეზიდენტი ე.წ. ფაიფურის დასახლებაში მცხოვრებ 91 წლის ოლგა ცალანს ესტუმრა და ომის ვეტერანს ღირსების ორდენი გადასცა ფაშიზმზე გამარჯვებისა და მეორე მსოფლიო ომის ვეტერანთა მოძრაობაში შეტანილი პირადი წვლილისათვის
ვეტერან ქალბატონს გიორგი მარგველაშვილმა დღეს გადასცა 140 ლარიანი მედიკამენტების ვაუჩერიც ფარმაცევტული კომპანია „ავერსისა“ და პრეზიდენტის ადმინისტრაციისგან.
„ვულოცავ ყველა იმ ვეტერანსა და ყველა იმ ადამიანს, ვინც იბრძოლა ფაშიზმის დამარცხებისათვის და ვინც დაამარცხა კაცობრიობის ეს საშინელი სენი.
ვულოცავ და მადლობას ვეუბნები მათ, იმისათვის, რომ მსოფლიო არ ჩაიძირა ამ საშინელების მორევში.
სწორედ მათი დამსახურებაა, რომ კაცობრიობა ჰუმანიზმის იდეების ირგვლივ ტრიალებს“ – აღნიშნა საქართველოს პრეზიდენტმა.
გიორგი მარგველაშვილი ზუგდიდში იმყოფება, ის საკონსტიტუციო ცვლილებების საყოველთაო განხილვაში მიიღებს მონაწილეობას.