ზუგდიდში თამბაქოს საწყობი დაიწვა, ხანძარს მსხვერპლი მოჰყვა.აფეთქების შედეგად საწყობის მენეჯერი – ბესო ჯგუშია დაიღუპა. აფეთქება, რომელიც, წინასწარი ინფორმაციით, მოკლე ჩართვამ გამოიწვია, იმდენად ძლიერი იყო, რომ შენობა მთლიანად დაანგრია, მისი ნამსხვრევები კი 60-70 მეტრის რადიუსში მიმოფანტა. ახლომდებარე კერძო სახლები არ დაზიანებულა. აფეთქებას ხანძარი მოჰყვა, რომლის ლოკალიზება მალევე მოხერხდა. ნანგრევების გაწმენდის დროს მაშველებმა მამაკაცის ცხედარი აღმოაჩინეს, რომელიც ბეტონის ფილებქვეშ იყო მოყოლილი.
როგორც გაირკვა, დაღუპული საწყობის მენეჯერი, 44 წლის ბესიკ ჯგუშიააა. აღსანიშნავია, რომ შენობა, რომელიც აფეთქდა, გაეროს ზუგდიდის ოფისის ყოფილი შენობაა, რომელიც თავის დროზე, სწორედ გაეროს უსაფრთხოების სტანდარტების გათვალისწინებით აშენდა – ორმაგი კედლითა და სხვა პარამეტრებით. აფეთქებამ ბეტონის ფილები მომცრო ნაწილებად დაშალა. საწყობის მეპატრონეები ამბობენ, რომ შენობაში არანაირი ფეთქებადსაშიში ან აალებადი ნივთიერება, ასევე საბრძოლო მასალები არ ინახებოდა და გაურკვეველია, რამ გამოიწვია ასეთი სიმძლავრის აფეთქება.
ბესო ჯგუშია საქართველოს პარლამენტის ყოფილი წევრის, სოციალისტური პარტიის წარმომადგენლის თენგიზ ჯგუშიას ახლო ნათესავია და წინასაარჩევნო პერიოდში მის შტაბშიც იყო დასაქმებული.