ჩემი და ბიძინა ივანიშვილის ურთიერთობა დამთავრდა მაშინ, როცა დამთავრდა, – ამის შესახებ საქართველოს პრეზიდენტმა გიორგი მარგველაშვილმა სოხუმის უნივერსიტეტში, სტუდენტებთან შეხვედრაზე, არაფორმალური მმართველობის შესახებ დასმული კითხვის საპასუხოდ განაცხადა.
მისი თქმით, უამრავი ინფორმაცია მისდის, რომ ბიძინა ივანიშვილმა ვინმე აიძულა, ვინმეს რამე უთხრა, მაგრამ ამაზე არ საუბრობს, რადგან ჭორებზე არ საუბრობს.
"ჩემი და ბიძინა ივანიშვილის ურთიერთობა დამთავრდა მაშინ, როცა დამთავრდა. ჩვენ მის მერე არანაირი ურთიერთობა არ გვქონია. ბევრი ამბავი მოდის ჩემამდე, რომ ან ბიძინამ აიძულა ან ბიძინამ უთხრა და ა.შ. მე ხომ არ ვიცი, რომ ეს სიმართლეა? -ამიტომ რა უფლება მაქვს ჭორებზე საუბრის. როდესაც ენა მოაქვს ვინმეს, ე.ი. ეს ადამიანი რაიმესკენ მოტივირებულია, წრფელი გულით არავინ ჭორაობს. ბევრი ინფორმაცია მოსულა, მაგრამ ამ ჭორების განხილვა ჩემი შეურაცხყოფაც იქნება და თქვენიც. როდესაც ჭორაობ, ცუდია ტვინის ჰიგიენისთვის, ტვინში გიჩნდება ბუზები, რომელიც ცუდად მოქმედებს", – განაცხადა მარგველაშვილმა.
მისივე თქმით, ის მაქსიმალურად ცდილობს პიროვნულ საუბარს თავი აარიდოს.
"მე რამდენადაც შემიძლია, ვცდილობ მოვწყდე ჭორს, პიროვნულ საუბარს და არაფორმალურ განხილვებს. პოლიტიკაში ძირითადად საუბარია ან ჭორზე, ან სხვის შიგანაგან მდგომარეობაზე. ჩემზე იმდენი ანალიზია ჩატარებული, ალბათ, ფროიდი ტირის, რადგან მუდმივად შესწავლის ობიექტი ვარ", – განაცხადა მარგველაშვილმა.