„27 აპრილის მონაცემებით, შენგენის ზონაში, რომელიც 30 ქვეყანას მოიცავს, უვიზოდ საზღვარი საქართველოს 11 700-მდე მოქალაქემ გადაკვეთა, საზღვრის გადაკვეთაზე უარი ეთქვა მხოლოდ 26 მოქალაქეს, რომელსაც საბუთები არ აღმოაჩნდა წესრიგში. ევროპასთან ინტეგრაციის საპარლამენტო კომიტეტის თავმჯდომარე თამარ ხულორდავა ხაზგასმით აღნიშნავს, რომ   ეს შემთხვევები უკავშირდება მხოლოდდამხოლოდ ობიექტურ გარემოებებს ანუ არასაკმარის დოკუმენტაციას და არა სუბიექტურ გადაწყვეტილებებს, რომელსაც იღებს ადგილზე მყოფი მესაზღვრე,  შესაბამისად,  პირველი ერთი თვის ეს მაჩვენებლები „ნამდვილად კარგია“, რამდენადაც არ მართლდება შიში, რომ უარს ამა თუ იმ მიზეზით ბევრად მეტი მოქალაქე მიიღებდა.  

 

„მე ვფიქრობ, უნდა გავაგრძელოთ აქტიური მუშაობა საზოგადოების ინფორმირებისთვის, რომ კარგად იცოდნენ, რას გულისხმობს უვიზოდ მიმოსვლის რეჟიმი, რა უფლებას აძლევს მათ ეს შეღავათი და რა დოკუმენტაციის ქონაა საჭირო. რაც შეეხება იმას, რამდენად ვასრულებთ რეჟიმის პირობებს, ჯერ ამის თქმა შეუძლებელია – იცით, რომ ეს არის 3-თვიანი ხანმოკლე ვიზიტის პერიოდი და ჯერ გასულია მხოლოდ 1 თვე. შესაბამისად, 90 დღის გასვლის შემდეგ გვეცოდინება, რამდენად დაიცვეს ჩვენმა მოქალაქეებმა ეს მოთხოვნა“, – განმარტა თამარ ხულორდავამ.