,,შენ ჩემთვის რა გატირებდა, მე შენთვის რა მირგიაო'' – კახი კალაძის გაზპრომთან შეხმატკბილება და მასთან დაკავშირებით მალემრწმენი ადამიანებისთვის თავსმოხვეული ილუზიები განქარდა. დრომ და ცხოვრებამ ნულამდე დაიყვანა ენერგეტიკის მინისტრის ყველა არგუმენტი გაზპრომთან ხელშეკრულების სასარგებლოდ.
,,გემახსოვრებათ, თუ როგორ ატეხა პანიკა ენერგეტიკის მინისტრმა , ქვეყანაში გაზის მოხმარება იზრდება, აზერბაიჯანს გაზი არ აქვს და თუ გაზპრომისაგან არ ვიყიდით, გავიყინებითო. ამისთვის კი საჭიროა გაზპრომთან დათმობებზე წასვლა და ჩვენთვის საზიანო ხელშეკრულების გაფორმებაო.
ეს პანიკა შახდენიზის კონსორციუმმაც კი დაიჯერა და სასწრაფოდ საქართველოს დამატებით გამოუყო 500 მილიონი კუბური მეტრი გაზი.
გუშინ, პარლამენტში ენერგეტიკის მარეგულირებელი კომისიის ანგარიშის მოსმენისას გაირკვა, რომ 2016 წელს 2015 წელთან შედარებით საქართველოში გაზის მოხმარება არა თუ გაიზარდა, არამედ შემცირდა 6,4 პროცენტით. ბუნებრივია, არც აზერბაიჯანიდან საგანგებოდ გამოყოფილი გაზი დაგვჭირდა და მითუმეტეს, არც გაზპრომიდან. ქვეყნისთვის საზიანო ხელშეკრულებას კი მაინც მოეწერა ხელი.
გეკითხებით: უნდა აგოს თუ არა პასუხი ენერგეტიკის მინისტრმა თუნდაც ცრუ ინფორმაციის გავრცელების გამო? – სვამს კითხვას ნაციონალური მოძრაობის ლიდერი რომან გოცირიძე.