დღეიდან საყოფაცხოვრებო თუ სხვა სახის ნარჩენით გარემოს დაბინძურებისთვის განსაზღვრული ჯარიმები რეალურად ამოქმედდება, მაგრამ კონკრეტული ნაბიჯები ჯერჯერობით მხოლოდ დედაქალაქში გადაიდგმება.
შპს "თბილსერვის ჯგუფის" ზედამხედველობის სამსახურის ინსპექტორები დედაქალაქში ხალხმრავალ ადგილებში წყვილში იმოძრავებენ – სპეციალური უნიფორმის გარდა, ისინი აღჭურვილნი არიან თანამედროვე ტიპის დამხმარე საშუალებებით – პლანშეტებით და სამხრე კამერებით, რათა თავიდან იქნას აცილებული კონფლიქტური სიტუაციები.
დაჯარიმება მოხდება "ნარჩენების მართვის კოდექსის" შესაბამისად, ნარჩენების მართვის კოდექსის შესაბამისად. დაჯარიმდებიან როგორც იურიდული ისე ფიზიკურ პირებიც.
კოდექსში გაათვალისწინებულია შემდეგი ოდენობის ჯარიმები:
• 2 კგ-მდე მუნიციპალური ნარჩენით გარემოს დანაგვიანება – 80 ლარით, იგივე ქმედება ჩადენილი შენობა-ნაგებობიდან – 100 ლარით.
• 2 კგ-ზე მეტი მუნიციპალური ნარჩენით გარემოს დანაგვიანება – 150 ლარით, იგივე ქმედება ჩადენილი შენობა-ნაგებობიდან – 500 ლარით.
• ძაღლის ან სხვა შინაური ცხოველის მცირე ოდენობის ფეკალური მასით ტერიტორიის დაბინძურება- 50 ლარით. (პასუხისმგებლობა არ დაეკისრება მეპატრონეს, თუ იგი დაუყონებლივ და სრულად მოასუფთავებს დაბინძურებულ ტერიტორიას).
• ხუთ ერთეულამდე საბურავით გარემოს დანაგვიანება (ველოსიპედის საბურავის გარდა) – 150 ლარით.
• ხუთი ერთეული ან ხუთ ერთეულზე მეტი საბურავით გარემოს დანაგვიანება (ველოსიპედის საბურავის გარდა) – 500 ლარით.
• სახიფათო ნარჩენებით გარემოს დანაგვიანება ან სხვა ქმედება, ჩადენილი ნარჩენების შეგროვების კონტეინერის გარეთ:
ფიზიკური პირი -400 ლარით, იურიდიული პირი -1000 ლარით დაჯარიმდება.