წმინდა ცეცხლს იერუსალიმიდან საქართველოში ჩარტერული რეისით დღეს, 23:30 საათზე ჩამოიტანენ.
„პილიგრიმ ტურსის“ დამფუძნებლის ლაშა ჟვანია ამ დროისათვის საქართველოდან ჩასულ სხვა მორწმუნეებთან ერთად იერუსალიმში, უფლის აღდგომის ტაძართან იმყოფება და წმინდა ცეცხლის გადმოსვლას ელოდება.
მისი თქმით, ტაძარში და მის მისადგომებთან უამრავი მორწმუნეა შეკრებილი, ტაძარში სადაც მხოლოდ 3-4 ათასი მომლოცველი ეტევა, საქართველოდან ჩასული 100 მომლოცველიც რომ მოხვდეს, ძალიან ბევრია.
მან აღდგომის ტაძარში წმინდა ცეცხლის გადმოსვლისას ტრადიციულად სხვადასხვა ქრისტიანული რელიგიის წარმომადგენლების სიმრავლეს გაუსვა ხაზი. „ტაძარში მსოფლიოს სხვადასხვა ქვეყნიდან მართმადიდებლებთან ერთად იერუსალიმში სხვა ქრისტიანული სარწმუნეობის მომლოცველებიც ჩადიან. მაგალითად, კოპტები, რომლებიც ძალიან მძიმე მდგომარეობაში არიან. პრაქტიკულად დევნასა და შევიწროებაში იმყოფებიან. ბევრი მოწამებრივი სიკვდილით კვდება. პილიგრიმობაზე იერუსალიმში ძალიან ბევრი კოპტი ჩადის. მაგალითად, წელს 10 ათასამდე კოპტია ჩასული.
ლაშა ჟვანიას თქმით, ქართველ მორწმუნეებს და სახელდობრ ცეცხლის ჩამოსატანად წასული ჯგუფის წევრებს ისრაელის საზღვარზე შესვლისას პრობლემები არ შექმნიათ.