„მეტი ვერაფრით ვერ დაგვემუქრებიან, ვერც ევროკავშირში გაწევრიანებით, ვერც „რეადმისიის შესახებ“ შეთანხმებით. მორჩა, ეს დრო დასრულდა. 16 აპრილს მმართველობის საპრეზიდენტო ფორმაზე გადავალთ და სრულიად ახალი თურქეთი დაიბადება. წლების განმავლობაში ევროკავშირი მიგვითითებდა თავის კრიტერიუმებზე, ახლა კი თვითონ თელავენ თავიანთ კრიტერიუმებს. 16 აპრილის რეფერენდუმის შემდეგ მოლაპარაკებების მაგიდას მივუსხდებით, დავილაპარაკებთ. როგორც ახლა, ასე საქმე ვერ გაგრძელდება“, – აცხადებს თურქეთის პრეზიდენტი რეჯეფ თაიფ ერდოღანი.
16 აპრილს დაგეგმილი საკონსტიტუციო ცვლილებების შესახებ რეფერენდუმის შემდეგ, თურქეთი ყოველმხრივ და დეტალურად განიხილავს ევროპის ქვეყნებთან ურთიერთობებს – განაცხადა ერდოღანმა ანკარაში სიტყვით გამოსვლისას. აღნიშნულის შესახებ სააგენტო „ანადოლუ“ იუწყება.
„თურქეთი პასუხს მოითხოვს მასზე წნეხის განხორციელების მცდელობებზე. ჩვენ ასევე მოვითხოვთ პასუხს ჩვენი დიასპორის წარმომადგენლებთან მიმართებაში უხეშ მოპყრობაზე, რომლებსაც ჰოლანდიელი პოლიციელები ძალის გამოყენებით მიათრევდნენ“, – განაცხადა თურქეთის პრეზიდენტმა.
მისი თქმით, რიგი ევროპული ქვეყნების ხელისუფლებებმა ყველაფერი გააკეთეს, რათა ჩაეშალათ თურქეთის ხელისუფლების ოფიციალური პირების მონაწილეობით ჩასატარებელი ღონისძიებები.
თურქეთის პრეზიდენტმა აღნიშნა: ,, მორჩა. ეს დრო დასრულდა – ევროპა ვერ შეძლებს თურქეთზე გავლენის მოხდენას ევროკავშირში შესაძლო გაწევრიანების საბაბით''.