მიმდინარე წლიდან ავტომობილები საშუალოდ 30%-ით გაძვირდება. ფასები, პირველ რიგში, მოიმატებს 7-დან 15 წლამდე მანქანებზე, რომელზედაც დიდი მოთხოვნაა ხელმისაწვდომი ფასის გამო (ოფიციალური მონაცემებით, იმპორტირებული ავტომობილების 95% სწორედ 7-20 წლამდე სატრანსპორტო საშუალებებია).
ექსპერტების ამ უსიამოვნო პროგნოზს საფუძვლად უდევს საგადასახადო კოდექსში დაგეგმილი ცვლილებები, კერძოდ იმპორტირებულ ავტომობილზე აქციზის განაკვეთის გაზრდა – ერთნაირი, მომატებული ტარიფით იბეგრება როგორც ახალი – ერთ წლამდე ავტომობილი, ისე 14 წელიწადზე მეტი ხნისა. აქციზი უცვლელი დარჩა მხოლოდ 3 და 4 წლის მარცხენასაჭიანი ავტომობილებისთვის, ხოლო 5 წლის ავტომობილისა შემცირდება კიდეც, თუმცა ეს შეღავათი ავტომობილის თვითღირებულებაზე დიდ გავლენას ვერ მოახდენს.
რეალური შედეგი, რასაც ავტომობილების განბაჟებისას აქციზის ზრდა გამოიწვევს, ავტომობილების საშუალოდ 30%-ით გაძვირებაა – მარცხენასაჭიანი ავტომობილებისთვის. მაგალითად, ავტომობილი, რომლის საბაზრო ღირებულება დღეს საშუალოდ 3 ათასი დოლარია, ახალი სააქციზო ტარიფების ამოქმედების შემდეგ დაახლოებით 1 000 დოლარით მაინც გაძვირდება. უფრო კონკრეტულად, თუ მოქმედი ტარიფებით 2005 წლის წარმოების, 2000 კუბსმ მოცულობის ძრავიანი ავტომობილ "მერსედეს-ბენც" C-Class-ის შემთხვევაში 1 კუბსმ-ის განბაჟება ღირს 0,5 ლარი და ჯამში 1 000 ლარი დაჯდება, ცვლილების ამოქმედების შემდეგ 1 კუბსმ-ის განბაჟება 1,2 ლარი ეღირება და განბაჟება უკვე 2 400 ლარი დაჯდება (მარჯვენასაჭიანისა – 7 200 ლარი).
რაც შეეხება მარჯვენასაჭიან ავტომობილებს, მათი განბაჟება მარცხენასაჭიანებზე სამჯერ ძვირი ღირს, რაც ავტომობილის თვითღირებულებას აღემატება და მათი ჩამოყვანაც აზრს დაკარგავს.
როგორც ,,კვირის პალიტრა'' წერს, პრობლემების წინაშე აღმოჩნდნენ ავტოდილერებიც. კერძოდ, საგადასახადო კოდექსის 309-ე მუხლს ემატება მე-100 ნაწილი, რომლის თანახმად, გაზრდილი ტარიფი არ შეეხება იმ ავტომობილებს, რომელთა ტრანსპორტირება დაწყებულია 2016 წლის 1-ლ დეკემბრამდე, მაგრამ ავტომობილის შეძენისა და ტრანსპორტირების თარიღები 1 კვირიდან 1 თვემდე მერყეობს. შესაბამისად, ბევრი ავტომობილია შეძენილი 2016 წლის 1-ლ დეკემბრამდე, რომელთა ტრანსპორტირება ამ ვადამდე არც დაწყებულა. ეს კანონპროექტის მნიშვნელოვანი ხარვეზია, რადგან ის რეგულაციას რეტროგრადულად გვიწესებს და უკვე ნაყიდ ავტომობილებს გვიძვირებს.
რაც შეეხება კითხვას, ღირს თუ არა კანონში ცვლილებების შესვლამდე ავტომობილის შეძენა ან გაყიდვა? შექმნილი ვითარება ავტომობილის შესაძენად ბევრისთვის იქნება მომგებიანი, თუმცა რისკებიც ახლავს თან. ახლა ბაზარზე გაურკვევლობაა, შესაბამისად, ავტომობილების ყიდვა-გაყიდვის ოპერაციები საგრძნობლად შემცირებულია, რამაც გამოიწვია ფასების ვარდნა როგორც ადგილობრივ ბაზარზე, ასევე იმ საერთაშორისო აუქციონებზე, სადაც საქართველოში ჩამოსაყვან ავტომობილებს ყიდულობენ. ასეთ ვითარებაში ადგილობრივ ბაზარზე ავტომობილის შეძენა საკმაოდ სარფიანად არის შესაძლებელი, აგრეთვე, მეტად მაცდუნებლად გამოიყურება ფასები საერთაშორისო აუქციონებზე, თუმცა დიდი მნიშვნელობა ექნება იმას, დაანონსებულ ვადებში ამოქმედდება თუ არა კანონპროექტი.